一年一度的書展又來啦，基於實習的緣固，只可以從星期六同日揀一日去，原定星期六去，但最尾同事有星期日贈券，所以星期日同阿媽去左書展(今次係第二次唔洗自己畀錢去書展，第一次係中四個陣，學校要我地參加一個書展活動，之後全部原車來，自己走XD)。

不過，搭西鐵之前有一件唔太開心既事，事源係一落輕鐵，有個阿伯問我借3蚊，話自己唔見左八達通，我就係因為睇唔清楚阿媽D動作[阿媽原意叫我唔好信]，加上佢講野D聲線好低沉，個樣又好慘咁，所以我就白白送左3蚊畀人洗。最慘係我仲要見到阿伯拎完個3蚊之後健步如飛咁跑入去一架岩岩到的輕鐵，我個陣先知被騙，我就好嬲自己被人利用左同情心，如果有機會再遇到佢，我會想問佢一句：「點解你會好意思咁做?」。事後，上網查下有冇好似我咁被騙，初步懷疑阿伯係專門向我呢D後生女埋手，然後拎錢去買煙OR毒品，

ANYWAY，錢都被人呃左，我冇得怨，只怪自己見得世面少。同時，我希望阿伯如果仲有D羞恥之心既，會知道自己咁做係累己累人。客氣D講，回頭是岸。但黑心D講一句，呃番的的錢你唔會洗得安樂，你仲要拎去買煙/毒品，小心自己條命好呀!!!

唔講呢d衰野啦，咁同阿媽搭西鐵去書展啦，因為本身有飛，畀個票尾職員就可以入去啦，都唔洗點等，之後同阿媽係hall 1 各有各行，行左2,3個鐘度都冇未收獲，咁同阿媽食lunch先啦，一人一個蛋糕+杯麵，唔算係咩美食，但至少我唔會畀百幾蚊食個d所謂「自助餐」，或姐一杯汽水要$16囉。仲做水魚咩?

食完lunch，就上3樓睇砌圖啦，好遺憾，今次揀唔岩，一來我上次砌1518，今次至少2000(但2000的砌圖唔靚)，想砌幾米，但太貴，仲要得1000塊，所以空手而回。

但我唔會兩手空空番去既，去到一攤位，賣經數碼修復的80s-90s港產片DVD，$50有3隻，於是同阿媽湊夠3隻(因為屋企VCD睇到花晒，索性用DVD代替)。不過呢3套戲大家應該好少睇，但，有咩所謂? 我同阿媽鍾意就得啦

之後行番去HALL 1，最後都掃左一D郵票同一本想買好耐，終於忍唔住要買的書.........《不一樣的Big Four》，本來想去其他攤位睇下有冇，最後發現都係冇，都係去青春文化買，得八折，都好過畀原價既

去相--------->

書展贈券，因為冇星期六，只係改星期日去

Chocolate Rain的展品，近年非常成功的本地品牌

想買好耐，最後8折成交，多謝$62.4

最多人識既應該係最左手邊那張《情聖》，中間係《開心勿語》有梅姐同志偉，最右手邊的係《霸王花》

最後，同阿媽去銅鑼灣食埋燉蛋同燉奶就坐地鐵番屋企lu~

P.S 稍後時間發表一份讀書報告，啊! 唔係，係少少個人抒發姐