首先講講我棚牙既問題~
由細到大, 我都經常蛀牙  , 成日去見牙醫補牙~ 先聲明, 我有刷牙架  仲係早晚都刷的~ 但可能唔夠鈣、又或者太愛甜食既關係, 直至而家已經亭亭玉立  都仍然係成日蛀牙  一隻牙可以補幾多次丫~ 所以....有兩隻大牙無得救, 已經剝左~ 無錯...係已經無左兩隻大牙!  另外, 有一隻大牙之前補左既, 但無意中發現...崩左! 天呀......又要搵牙醫?!  牙醫話...建議我整個牙套笠住佢(保護佢), 我諗住婚後(2014年3月)去COOL牙, 不如問下矯齒牙醫意見先, COOL牙前多數要 剝牙, 或者可以剝呢隻, 咁咪唔洗多此一舉整牙套嚕
BOOK左23/1/2013見 矯齒牙醫問佢呢隻牙同埋COOL牙既意見, 不過20/1/2013開始, 覺得另一邊某隻大牙有啲痛痛地....咬唔到野, 一咬就FEEL到痛! 死啦...點算?! 反正過多兩日見醫生, 到時先算!
23/1/2013：
矯齒牙醫話你真係有需要COOL牙呀, 因為你門牙唔齊, 有1/2叠住左, 而且有少少蛀牙跡象, 果個位因為你 叠住, 所以補唔到架~ (好驚好驚...要快啲COOL牙移開佢地先得! )之前提過一早無左兩隻大牙, 醫生話其中一隻係最尾果隻, 問題不大, 而另一隻, 係尾二既大牙, 個位好開, 建議種牙! 天呀..............救命~~~~~~~~~ 不過醫生話, 可以先COOL牙, 睇下進展先, COOL完都兩年後, 到時可能個缺口位細好多~ 又或者真係進度良好, 已經埋哂位, 唔洗種番隻牙, 不過移前左啲牙, 要落一粒細螺絲落最尾啲牙肉度, 頂住最尾隻牙..唔比佢向後移番開........................(聽到呢度已經想死 )
後來, 醫生話不過點都好, 都要照左x-ray同做左牙模 睇清楚所有牙先~ 於是印左牙模、照左x-ray、擺低1000大元, 然後約左31/1/2013返黎睇片~
28/1/2013：
睇完牙醫幾日, 我啲牙又有事啦 刷刷下牙, 哎呀! 有啲野跌左出黎! 一睇! 有牙崩左??!!  自我檢查過後, 又另一隻大牙崩左! 唉~~~~~~~~~~~~~~ 點算呀!!!!!!!!!!!!!!!!!!!!! 又係3日後返去見醫生, 到時先講啦
31/1/2013：
今日, 一見到醫生已經即時叫救命..........『我又有大牙崩左啦 』牙醫見到我都怕 都未睇, 已經叫我戒哂所有甜野  左邊下面係正常的~ 左邊上面最尾果隻大牙早就無左, 而家最尾果隻就係早幾日崩既, 暫時未見有蛀牙跡象, 需要做牙套! 到右邊, 下面尾二果隻大牙早就無左, 缺口好大, 但可以唔理住, COOL後面果隻上黎睇下進展點~ 而上面最尾果隻, 就係半年前崩左既大牙, 細個補左好大範圍, 而家發現補牙既東西下藏左野, 仲有少少痛, 醫生估計已經蛀得幾深, 建議剝鬼左佢! 點解唔救佢、叫我剝呢.....而家講....
醫生拎我張x-ray出黎比我睇, 我一睇....好驚............... 因為我上面左右兩邊都有未生既智慧齒 (下面左右都無) 慶幸既係佢地兩隻都好靚仔, 而且只係被牙肉薄薄蓋住~ 牙醫話, 唔救你蛀緊果隻大牙, 係因為你有隻靚智慧齒唔洗剝, 所以索性唔要你呢隻爛大牙, 隻智慧齒用COOL牙方法COOL佢上黎代替大牙~
問題好似已經講完咁, 其實未~
兩隻智慧齒係未出架, 只係唔深, 即係出到剛剛好牙肉表面之下, 所以牙醫話要COOL佢地移前, 就要佢地出黎, 方法係界開少少牙肉, 貼COOL牙粒粒, "引領"佢出黎之餘 同埋移向前................
|
