６月１５日，星期二

1:00PM考試，一早未夠9點就起身溫書，係咪好乖呢？！其實係因為尋晚溫得一半，之後太眼訓，3點幾就走左去訓覺，嘻嘻

Celine同Joan考朝早，佢地11點幾考完就打俾Susie，話份卷考文法多，唔洗背課文！哈哈，都唔知份卷係咪一樣，通水都冇用！

考試考兩小時，其間輪住去第二間房考口試！明明我出去考口試前課室坐滿晒人嫁，返到黎得返三份一人！因為我口試考左好耐∼

口試分對話同聽帶答問題，我考分班試時淨係考對話，可能因為講得差所以連帶都唔洗聽。今次我進步左，去到聽帶果part啦！！

其他同學話佢地淨係聽左兩段對話，但我聽左四段law＞＜　唔知係咪因為之前答得唔好，佢想再俾機會我拎分，所以聽多兩段∼

不過都冇用，第三段開始我已經聽唔掂，答唔到佢d問題，但佢繼續叫我聽第四段！所以個個都話我口試考左勁耐，以為我迷路.....

口試用左好多時間，攪到我要留到最後一刻先做晒份卷！我又唔識路去Kelly屋企，所以要Susie同旭同學等埋我，真係唔好意思啦！

哈哈，雖然考得唔係幾好，不過考完試緊係要慶祝下啦！！又一大班人去Kelly屋企玩∼

　唔講仲以為去野餐tim呀！！

　其實重點係我响隻杯到畫左隻好可愛o既貓∼

　感謝天馳同學o既一啖面，有機會我會還返俾你∼文同學完全變左個杯麵，哈哈！

　今次旭同學冇飲醉酒啦∼換左Yumi同文同學兩個醉左，哈哈！！！

　Yumi醉了，將旭同學o既腳當做枕頭，呢個動作仲要hold住好耐，笑死∼

Yumi要對旭同學負責呀！所以响張天馳牧師同埋我地咁多位見證下，佢兩個結成夫婦了。所以話呢，千祈唔好飲醉酒

　又係天馳同學批薯仔，佢多左個名叫＜土豆王子＞

　放心！！！佢地唔係飲醉酒响到除衫，只係俾我地睇下d腹肌啫∼

　玩到餓响廚房偷野食！懶得開火，唯有食生食椰菜！平時响宿舍都食唔少∼

今日終於有玩遊戲啦∼玩＜七級豬＞同＜come棉胎＞時太瘋狂，我副啤牌有隻爛左呀！已經係膠啤牌黎嫁啦，咁都可以整爛.......

不過唔緊要，用膠紙幫佢做個小手術應該OK！副牌响韓國買，要成60蚊港紙嫁！諗諗下，原來去韓國已經係10年前o既事！

Kelly仲有個日本朋友黎左，不過大家唔洗講日文，因為阿倍SAN响台灣住過一年，所以識講國語！12點幾返到黎即刻沖涼訓覺

　希望大家可以繼續同班啦