好多日冇認真打日記，日日淨係掛住訓覺...睇劇...望住加藤成亮...哈哈∼　呢d就係演唱會後遺症，Yvonne都有呢個病

９月１７日，星期五

果日係前期末試驗，就係因為考試唔洗帶咁多野返學，所以我換左個袋，結果張車飛漏左响舊果個袋到

本來我諗住搭23分班車，但後來我返上房拎返張車飛，攪到要搭29分班車，返到學校一坐低就打鐘，真係好驚險＝O＝

　明明朝早好悠閒咁食早餐，最後都係要趕頭趕命咁返學.......

　考完試同Susie，Iku，天馳同學，旭同學去心齋橋食＜一蘭拉麵＞

　溫泉蛋加 100YEN　 　拉麵 780YEN

聽講＜一蘭拉麵＞好出名，全店只有一款拉麵，一定唔會叫錯！！味道OK，不過又冇佢地講到超級好味！普普通通啦∼

　同Susie行街見到超可愛o既蛋糕，真係唔捨得食∼

　下午茶，朱古力卷

嘩！！！呢個朱古力卷真係好好味∼∼聽講學校附近車站都有一間！！下次有d咩野慶祝可以買黎食，唔洗次次食＜鬍鬚爸爸＞

　晚餐只有10分鐘時間食！因為趕住9:00PM開枱同Kaku，阿Tom，Ruby打麻雀，哈哈∼∼

本來諗住响麻雀枱贏返d錢買演唱會商品，點知事與願違，輸左240YEN　d牌弱到呢...真係用AA超能膠都痴唔埋！！

好彩我醒目唔做大牌，食下d三番牌咋，如果唔係輸得仲多！！肯定係因為高同學搭過我膊頭所以輸錢！！

９月１８日，星期六

同Yvonne睇NEWS演唱會，早出晚歸！

　午餐响DOME裡面o既餐廳食，午餐SET有烏冬同豬扒飯∼

　晚餐自己煮，雜菜味螺絲粉，好似好健康咁，哈哈∼∼

９月１９日，星期日

　午餐豬扒煎蛋意粉，煎完豬扒間房超大陣味，不過超好味，所以值得

　晚餐西蘭花炒肉片，用魚香茄子個醬炒，哈哈，完全係亂配搭∼∼

９月２０日，星期一

　咪以為呢個係早餐，其實係早餐加午餐加下午茶，哈哈，訓到1點幾先起身＞＜

個麵包係高同學請o既，個麵包好軟，入面好似係乳酪，唔......其實食完都唔知係乜，好難形容，總之就好好味啦

　晚餐食西餐，煎豬扒配薯菜！因為食有皮薯條所以買左樽茄汁∼∼

嘻嘻，有咁大樽茄汁，好想整茄汁蝦呀！！有冇人知道董事長o既茄汁蝦秘方呀？？

　粟米湯，沖熱水就飲得，超方便∼

　有冇人同我一樣，覺得蛋卷碎先係成罐蛋卷o既精華，仲要用匙羹＜筆＞黎食？！