１１月１４日，星期日

　今日晏晝又忍唔住去買冬甩食，我覺得之前食果款好味d！！

　晚餐有臘腸 + 膶腸 + 煎蛋 + 蟹柳 + 炒菜 + 炒麵

趁放假睇左幾套港產片∼

＜人間喜劇＞：杜汶澤王祖藍主演，無無聊聊，想笑下都可以睇o既∼

＜綫人＞：張家輝謝霆鋒主演，我覺得＜証人＞好睇d∼

＜美麗密令＞：蔡卓妍吳君如主演，不嬲都鍾意睇阿Sa，呢套推介，好好笑∼

＜分手說愛你＞：薛凱琪房祖名主演，故事一般！如果要睇年輕愛情戲，我覺得方力申鄧麗欣o既＜獨家試愛＞較好睇∼

１１月１５日，星期一

朝早搭車返學時，Susie因為女人病唔舒服，相信係女仔都會明白係幾咁辛苦！！見到佢面青口唇白，仲話頭暈作悶，睇見都辛苦！！

後來佢話要响中途站落車去廁所，冇理由丟底佢一個啫！所以我陪埋佢落車，一落車佢就話頭暈行唔到，坐左响月台地下，

响我去搵職員幫手之際，原來高同學都落左車，話晒Susie高我成個頭嫁ma，有個男仔响到扶下佢好好多∼

久寶寺車站真係好唔掂，要行勁遠先有便利店同藥房，好彩車站職員好好人，俾我地入去職員室，仲俾左杯暖水Susie飲。

最好笑係佢俾藥Susie食，不過係＜正露丸＞，Susie唔敢食！後來我地响個藥箱到搵到隻藥啱食，不過打開個盒，入面冇晒藥＝＝＂

最終第二堂先返到去，原因照直寫因為Susie唔舒服陪佢，唔知出席率扣剩幾多呢？真係扣開有條路，不過次次都唔係因為唔知醒！！

下午無啦啦要考試，唔知係咩野政府部門出o既試卷，主要係想睇下大家有幾了解日本或日文，完全唔識做，好彩唔計分嫁啫∼∼

　Ponchi Papa生日食大餐，我就食難食晚餐＞＜

１１月１６日，星期二

尋日我地同左寮長寮母講Leslie屋企有蚤咬，咬到佢d手腳紅晒，想响我地寮住幾日，寮長寮母好好人，批准佢黎住，唔洗屈蛇∼

所以今朝早人蛇Leslie可以光明正大咁同寮長寮母打招呼，唔洗好似尋日咁鬼鬼祟祟，哈哈∼ 唔知佢有冇帶埋d蚤黎我地寮呢？！

死啦，今日個測驗唔識呀，希望成績唔好咁低啦！！今日開始睇黃子華talk show，未睇晒，而家繼續睇，哈哈，BYE！！！