３月３０日，星期三
咁大個女第一次自己出筲箕灣，原因係拎部手提電腦去整！部電腦唔知仲乜鬼，臨返香港前一日壞左，初時都仲著到機，
只係滑鼠無啦啦停左唔郁，後來直頭連機都著唔到 攪到我响日本o既最後一晚要落去子瑩房同屋企人開眼仔！！
初時都驚自己會迷路，好彩一出地鐵站遇到個郵差，郵差一定熟路，有佢指點我實唔會行冤枉路，順利到達目的地。
３月３１日，星期四
收到電腦公司o既電話，話我部電腦係底板壞，零件要等三個星期先有！真係唔知好彩定唔好彩啦，臨返香港先壞。
如果响日本我又唔知拎去邊到整，萬一要整三個星期我真係會悶到癲！發現左一樣好離譜但又好攪笑o既事∼
話說尋日電腦公司俾我張維修單上面寫我响POLY U買電腦，但我明明係响HK U買！我趁今日佢打黎時同佢講返，
點知電腦公司方面話我張買機單上面係寫POLY U。事隔一年多我地先發現原來張買機單錯左＠＠""
但我明明睇機買機拎機整個過程都係响HK U攪掂，都點解會寫錯左做POLY U，d職員真係好唔小心！！！
４月１日，星期五
真係黑開有條路，繼手提電腦壞左後，又到手機充電器壞左＝O＝"" 諗住屋企咁多Nokia機，實有一個充電器啱用啦∼
點知.........原來插頭有大細之分，冇一個啱插我部機！ 唯有用住Hilda Mama部舊機先啦，有電話用好過冇電話用ma！！
點知.........一開機發現冇電話號碼！！！原來我d電話號碼唔係save落電話卡到 唉∼∼∼有電話等於冇電話！！
因為我完全唔記得朋友仔o既電話號碼，哈哈∼ 全晚响到等人打俾我，可惜打親黎o既都係推銷員.........
４月２日，星期六
同朋友仔去尖沙咀＜翠園＞食飯，由於阿Frank有員工優惠，加上八個人只計四位茶錢，所以呢餐超抵食∼
  片皮鴨，呢味我叫o既∼
  帶子西蘭花，鐵板叉燒
  鮑汁花菇，五花腩
  茄汁大蝦，鴨肉生菜包
  炒什菌，脆皮牛腩
 粟米班塊，其實仲叫左脆皮燒腩仔同炒飯，不過唔記得影相
一黎d野食黎得好慢，二黎又唔算係好大碟，所以食左十幾樣野都滿足唔到我地，一於繼續去食甜品∼∼∼
 有兩球雪糕加生果，都係$20，抵過食許留山／B仔涼粉多多聲！！
 阿Frank手長，玩自拍一定要有佢。
 有一個唔肯入鏡，咁做攝影師啦。
４月３日，星期日
帥軒好衰呀！！！！成日搶我d公仔！！！俾佢攬下冇所謂，但最衰係佢懶訓，成日踢我d公仔落床，有相為證∼∼
  布魯托好慘......
今日係五姨丈擺壽宴o既日子，我地一早就去酒樓飲茶，之後直落打麻雀。同Koeman打咁多次麻雀，今日第一次輸俾佢。
晉晉表弟好勁，拎埋部Wii遊戲機去，酒樓咁大部電腦，唔用黎打機咪嘥晒，哈哈∼ 帶左布魯托去同澄澄玩，佢話布魯托好大隻！
今日晉晉表弟做攝影師，如果我收到d靚相o既soft copy就post俾大家睇啦！！
 Ponchi Papa同Hilda Mama收到利是，睇下佢地幾開心∼
４月４日，星期一
趁Hilda Mama放假，帥軒考試放早，一家人入流浮山拜嫲嫲，仲帶左盒切雞燒鵝脾飯俾嫲嫲食tim！！
拜完嫲嫲就去食下午茶，發現元朗有間茶餐廳有超多款下午茶餐揀，如果屋企附近果d茶餐廳都係咁就好啦∼
夜晚同董事長，所長，所長位公子去麗都讌客食飯，後悔呀！！！ Ponchi Papa話請大家食龍蝦，
點知果間cheap cheap酒樓得兩三隻冇乜肉o既龍蝦，結果冇得食，早知就去人家啦，嗚嗚嗚.........
４月５日，星期二
今日係清明節，今年黎氏家族反傳統選擇正日去拜山，不過都係同平時一樣，約3:00PM等，但差唔多4:00PM先齊人！
我地用左個好民主o既方法去決定晚餐食乜，就係－－投票！！我地話：＜贊成晚餐食pizza o既就放低手＞
結果成條街o既人都贊成食pizza，哈哈∼ 不過都要就下d長輩，買d雞鴨叉燒，煮個鮑魚麵佢地食
４月６日，星期三
嘻嘻，終於有突破唔係响屋企hea啦！！咁啱Javy舖頭有個員工放一個星期假，所以搵左我去幫幾日手，每日返幾個鐘。
人老左記性真係差左！去日本前日日响何文田返工，但係我完全唔記得搭１７號巴士要搭幾耐！驚遲到所以今日早左出門口，
結果早左１小時返到去，第一次返工唔係趕頭趕命，可以好悠閒咁去大快活食個午餐。
４月７日，星期四
返工前去左KFC食野，原來KFC唔平嫁，未返工已經食左一個鐘頭人工 我呢個part time真係超麻煩，嫌何文田遠想返慈雲山，
攪到有個住慈雲山o既員工要調去何文田返工，哈哈∼ 電腦公司打黎話可以拎電腦啦，又會突然間咁快有得拎o既？！
４月８日，星期五
極度懷疑郵差叔叔同Ponchi Papa係咪夾埋o既！！次次都係Ponchi Papa返工先送掛號信黎，攪到我要披頭散髮咁去開門
 學校寄黎o既，好大份！！打開入面.........
  好靚o既畢業證書！
而且仲有成績表，好彩成績唔錯∼
  仲有一本畢業紀念冊，有齊晒咁多班o既相。
  
  我寫o既∼我個o麥頭係Susie畫嫁！！
  插入電腦竟然有校名＠O＠
夜晚同朋友仔食日本野預祝April生日，果到o既雪糕有四款口味，分別係ABCD，揀好左就寫落張紙到，張紙有兩個格仔，
佢意思係寫兩個英文字落去，但我同KK四款口味都想食，所以我地分別寫AB同CD，結果真係黎四球雪糕，哈哈
４月９日，星期六
一家人同Javy去大家樂食下午茶，Javy超真係超勁！食完一碗細叉燒飯加油菜後，再黎多個油雞脾加紅荳冰
回家途中行過間舖頭，Hilda Mama話想買野，結果行完一個圈後乜都冇買就走左，哈哈！！夜晚嫦姨媽上黎食飯∼
４月１０日，星期日
一早就入元朗飲茶，哈哈，雖然話一早，但其實我地遲左成個鐘先到！飲完茶緊係食下甜品∼
 帥軒以為有款雪條叫＜古天樂＞，又真係幾似wor
晚餐終於轉場地唔係去人家，我第一次去元朗o既大排檔，唔錯丫，特別係蒜蓉蝦！相姑姐响facebook post左，我唔post啦！！
４月１１日，星期一
今日返工雖然係返何文田，不過有家華哥哥車坐，所以超級方便，嘻嘻∼ 但係家華哥哥遲左黎接我，攪到遲左20分鐘開舖。
下午得返一個人响舖頭，好彩冇乜貨送黎！放工又有Javy同家華哥哥送我返屋企，真係好，有老闆車坐，哈哈∼
４月１２日，星期二
原來M記而家做緊優惠，12點至3點魚柳包餐同巨無霸餐都係$20，好抵呀！！返工之前去食左個巨無霸餐，好滿足！
返工要扮cool唔可以同其他人咁friend，廢事俾佢地識穿我係無間道o既身份∼到而家為止，暫時冇人發現！！
４月１３日，星期三
9點幾Javy打黎叫我返1:00PM，11點幾家華哥哥打黎話唔洗返，好彩我未出門口啫！！趁有時間去筲箕灣拎電腦∼
由於我部電腦响HK U買時係用Jenny姐姐個名，所以電腦公司話我今次整電腦要出示返Jenny姐姐o既授權書同身份證明書。
麻麻煩煩咁！！點知我拎到去，佢話之前以為我响Poly U買，所以先要我出示。我响HK U買的話就唔需要呢d野！
好彩果個係我咋，俾著係Hilda Mama，肯定拍左枱鬧人啦！！由於仲係保養期內，所以今次整電腦唔洗錢，LUCKY
４月１４日，星期四
星期一係唯一一日我朝早唔响屋企，就係咁啱郵差送掛號黎！初時以為係海運到左，原來唔係∼
  寄得掛號，好明顯係重要信
下午同銘銘去睇＜隱婚男女＞，全場得我地同一個阿伯！反而＜3D肉蒲團＞就勁多人睇，排隊買飛時，前後o既人都係買呢套！
無論男人女人定係阿叔，個個都係睇＜3D肉蒲團＞，唔知大家有冇諗住去睇呢？！強強約我去睇呀！！不過我冇應承∼
   好味道
４月１５日，星期五
Hilda Mama今日完全不在狀態！！煲好水後先發現原來未洗菜！！臨開飯先發現d龍脷柳仲响雪櫃入面未煎！！哈哈∼
 執房大清潔時發現寶物∼（雖然全部過晒期）
左：銘銘响哥倫比亞買俾我o既 右：台灣旅行時買o既
上同中：君儀男朋友响日本買俾我o既 下：韓國版，唔記得邊個買俾我
４月１６日，星期六
今日天氣真係好熱，熱到我要著小背心出街 夏天又黎啦∼今個夏天一定要去游水！！真係好耐冇游過水啦∼
入親馬會我大多數都會俾人查身份證，估唔到Javy入去都俾人查，我諗個職員緊係見Javy靚女，想知佢幾多歲，哈哈
４月１７日，星期日
同Hilda Mama訓到12點幾先起身，3點幾出到旺角會合埋嫦姨媽就去食Mos Burger同行街∼
  北海道薯餅，超正∼
  左邊o既係吉列八爪魚
  雞塊同炸雞都一般
行左兩個幾鐘已經好攰，晚餐Hilda Mama煮臘腸排骨飯，好味到連平時食好少飯o既嫦姨媽都添飯！！
４月１８日，星期一
弊弊弊！！！今日執我d陳年海報時，諗住收埋我而家貼緊o既李逸朗海報，點知.........
 連牆o既油都整埋落黎
唯有貼加藤成亮o既海報上去遮住佢啦∼∼其實都住左咁多年，d油甩出黎好正常，應該唔關我事掛（好一個藉口∼）
４月１９日，星期二
訓到11點幾餓醒左，不過而家Ponchi Papa習慣唔食午餐改食下午茶，所以我又繼續訓，訓到下午茶時段先起身∼
今日終於唔係去茶餐廳而係去大家樂食燒鴨瀨粉！帥軒好衰呀∼擄走我隻布魯托，帶落街俾同學睇，萬一走失左都唔知點算
４月２０日，星期三
銘銘今日生日，我專登教鬧鐘4:20AM起身，再send個生日短訊俾佢，咁有心思，唔洗爭做第一個同佢講生日快樂佢都一定記得我！
正當我想落街之際，突然有人拍門，係郵差送海運o既行李黎！！好彩我未出街，如果唔係郵差就會摸門釘∼
因為Ponchi Papa返工（都話佢地夾埋嫁啦！）點解佢唔打電話確認左有人先送黎？！因為我唔記得寫香港o既電話號碼，哈哈＞＜""
 就係呢箱野，咪睇少佢，重24.2KG嫁∼
|
