４月２２日，星期五

去琛哥屋企BBQ慶祝復活節，本來Hilda Mama病左唔想去，不過我同帥軒唔識路，所以Hilda Mama帶我地去。

無錯！！我地响琛哥屋企打保齡球！！不過係遊戲機果隻保齡球，唔好以為好容易，其實好難控制嫁∼

　6點幾開始燒野食，不過燒野食前要分工合作做準備！

　好多人都有份做大廚！

 　我只係借塊牛排黎扮下野影相，其實我冇份做大廚，哈哈∼

　琛哥响到煲水煮麵　 　晉晉响到炒麵＝＝""

　雞翼，魚蛋，普通野∼

　墨魚咀，豬仔脾

　鮑魚仔，大蝦，正！！

　札肉，魚

　d菇我落左超多蒜蓉醬，好彩冇攪到大家個口勁臭，嘻嘻∼

　仲有好多野食冇影到相∼∼

走時四姨丈車我地去太子道＜七喜＞買粥，佢無意中講句：＜買唔買蘋果呀？(iphone)＞，我先醒起未幫Ponchi Papa買蘋果 (報紙)

去到７仔竟然有最後一份蘋果，真係超好彩，如果唔係實俾Ponchi Papa鬧∼

４月２３日，星期六

下午去M記食野時，帥軒同個經理講：＜唔該俾碌棍我！＞　個經理即時呆左，唔通佢以為帥軒要碌棍黎打佢！？

其實帥軒只係要碌攪飲品o既棍啫，哈哈　聽日係三姨媽生日，我地買左蛋糕，壽司，煮左d簡單野同佢預祝∼

返到屋企樓下Hilda Mama就問想唔想食糖水，果時差唔多12:00AM，但我地都唔怕肥，照食！！！！

４月２４日，星期日

我同帥軒好樣衰呀！！約左去新蒲岡飲茶，我一直以為間酒樓叫＜三星＞，帥軒又話知道响邊wor，所以落車後我就跟住佢走，

行到去間酒樓門口，發現間酒樓叫＜明星＞，我好疑惑究竟係咪呢間，就响呢個時候，我地撞到四姨丈行緊去老人院接阿嫲，

佢話間酒樓係响我地落車果到，而且係叫＜長發＞。俾四姨丈發現我地兩個記錯酒樓名，又行錯去第二間酒樓tim＞＜

食晚去食飯，我地問個侍應係咪有燒鵝送，佢話有燒鵝券就有得送，佢個袋有好多，不過唔俾得我地。＝＝""

講埋晒d廢話，佢d券都係派俾客嫁啦！後來佢都有俾券我地，不過要鬼鬼祟祟放响第二到再叫我地去拎，驚死俾人睇到咁

４月２５日，星期一

樓下傻嫁！！朝早8點就响到彈琴，嘈醒晒我地全家人！！雖然放假啫，都唔洗咁早掛！！

晉晉表弟約我同帥軒打麻雀，仲話揸埋車黎接我地，咁好招呼緊係應邀啦∼今次我地打好細，八番出沖都係$64

SORRY∼係$6.4先啱！！今日好好彩食左好多糊，一家贏三家，有$10.4進賬，如果打平時果d，我贏$104呀！

唔知大家有冇食過橙汁涼粉呢？今日第一次試，因為涼粉唔夠甜所以加d芬達橙汁落去，原來幾好味，大家可以試下∼∼

４月２６日，星期二

一起身就覺得喉好痛，個人好似手軟腳軟冇乜力咁，睇黎開始作病！食完下午茶啪左粒丸仔後訓到Hilda Mama放工返黎，

咁啱Hilda Mama病完有藥剩低，啱晒！！有藥食可以唔洗戒口，夜晚食左紫菜同龍眼，希望聽日唔會出唔到聲啦∼