５月１５日，星期日
尋日個個姨媽都話今日唔得閒，諗住冇隊去飲茶，可以食其他野！點知訓醒一覺個個都計劃有變，又變返平時一樣去飲茶。
已經好耐冇去探婆婆，自從佢轉左飲奶之後，真係肥左好多，塊面脹卜卜，連轉身都要兩個人幫佢先攪得掂！！
就連Ponchi Papa都覺佢婆婆重呢∼∼晉晉表弟自從尋日被人以大話骰灌佢飲左幾支酒後，決定苦練大話骰，以免再被人灌醉∼
不過佢係用iphone個大話骰遊戲黎練，對手仲係阿精同帥軒，睇黎佢練極都唔會有咩野進展，哈哈∼
５月１６日，星期一
真係激死！平時兩點幾起身Ponchi Papa話我阻住佢做清潔！今日約左KK食lunch，11點幾起身佢又話我阻住佢做清潔＠＠"
究竟佢要做幾耐清潔呀？！ 同KK去cafe食lunch兼談心，行左陣街又去邊食雪糕邊談心，最後傾到7點幾先返歸∼
談心過後本來有少少眉目，沖完個涼後想法又唔同左，睇黎要再傾過先得啦，哈哈！！
 發現有鼻毛o既Kitty
５月１７日，星期二
Javy打黎話約左貞姐姐飲茶，問我去唔去，反正今日Ponchi Papa返工得我一個，所以答應左，又可以同澄澄玩∼
澄澄記性真係好，仲記住我地果日趁佢沖涼偷走o既事，嬲左咁耐都未嬲完！不過我請左佢食乳鴿，佢話唔嬲我啦！
  澄澄响到扮獅子
玩到要走o既時候佢又話好唔開心，仲有遊戲未同我玩，我叫佢寫低我個電話號碼，得閒就打俾我約我去佢屋企玩，
佢真係寫低左嫁，不過佢唔識寫我個名，唔知佢訓醒一覺之後會唔會唔記得個號碼係邊個嫁呢，哈哈∼
|
