話說今朝好無端端，係無做錯事，又依慣例做野既情況下，俾人嚴厲地"訓話"。

事關今日有個比賽，某組全組原來冇人帶到隻船返屋企，結果到齊人時都未有隻船係手。

佢地既理由係話一個下午先到既"阿sir(佢地明知亦認知道個阿sir下午先到!) 話佢會攞黎喎，所以佢地個個都冇攞到走喎"。

當場O哂咀啦! 一個咁impossible既藉口都有!

最慘係當中一個仔既父母信哂自己個仔講既野喎，重話我地老師同D仔既溝通好有問題喎，又唔幫d細路分好工邊個做邊樣喎，幾時黎幾時走幾時比賽都唔知喎!

個咀O得重大啦!  我地prepare左呢個比賽成2個月，又不斷提d仔，又出埋紙，你而家一句話幾時比賽，幾時走都唔知!  真係有口難辯!  最慘係d仔話冇見過張紙喎，要俾佢再睇後備的先"哦，過張。"

個女人重要話"都唔明點解做親咩活動都唔會留老師電話，"好似尋晚(星期六晚)發現隻船唔知係邊個到都搵唔到老師問喎"。你係咁緊張既就一早問啦! 尋日朝學校都有人啦! 你把口咁"勁"! 實入到去攞架船啦!  過時真係有d想喊。d仔話會攞隻船走既又唔係我，你有問題又唔一早問，而家黎抽稱做咩啫! 重要係咁"端"住我黎鬧! 

重要一聲領下，"咁而家係咪有人要返學校攞返隻船呢!" 。咁言下之意要我去攞啦!  到我話我而家即刻去先話 "我有車"。你有車就一早去啦!  重係到鬧我! 有獎攞咩! 我係帶隊老師呀! 唔係你個仔既阿四呀!  結果重要我跟埋你車去攞隻船，洗唔洗3個人去攞一隻船呀! 鑲金都唔洗啦! 你個仔係學生，留係到過班唔係學生咩! 好彩佢地冇係我離開期間出事啫! 唔係咪又係我"咩"飛! 

上到車重要兩公婆兩個夾擊，做咩呀!  婦唱夫隨呀!  係咁話都冇用架! 咁叻咪同阿頭講囉!  "吱吱喳喳"!  又講埋之前d活動安排點唔好點唔好! 唔好你就唔好參加啦! 好似人地迫你咁! 你估好辛你個仔咩! 成組都唔做野, 咪又係阿SIR同我整隻船出黎! 你又做過D咩呀! 連事前打個電話返學校問兩句都懶呀! 而家就扮到懶關心，懶有意見。

跟住澄清左一陣，個女人突然係我應緊佢老公時，大叫"唔好嘈"。原來佢自己打緊電話佢另一個家長fd。我即刻收聲啦，佢老公又即刻關左個收音機定player啦。原來呢個女人係咁既，自己講電話要全世界安靜就佢。咁真係唔怪得囉，不過難為左佢老公囉，要對住個咁既人成世。

重好~ 橫點我發覺呢對無知人物都係點講唔聽架啦，係都話我地錯架啦。佢講得好好聽架: "唔係話小朋友冇錯，但係老師都應該confirm哂所有野囉，唔係靠d小朋友...唔係問親咩都唔知...你同另一位老師可能因為都未結婚(其實個阿sir係結左婚)，未有小朋友，唔知父母會有幾緊張..." 又再一次O咀，未結婚都係一個被批評既理由...我冇你咁"好hao v"啫，室內室外都要帶黑超。真係冇野好講。我都費時出聲，望街算，見到佐敦過邊原來好多雀仔&大雀係到飛。

返到去時，d低能仔重走去問人地d staff幾時走得喎，係4點定5點喎(我地張紙寫左...)，係咪要等頒獎禮完先走得喎。唉! 有少少腦都知過d咁既主辦人員當然想你留到最後啦...問到人地都唔知點答好，咪好彩我行埋去話佢知冇獎就4點走得解圍...呢d資訊係1個月前人地個網頁就寫左啦...又再一次證明佢有幾咁關心呢件事...

最後，為左顯出我唔似佢咁係蠻人，我都同佢講返句"唔好意思喎，我頭先都緊張左。" 跟住頭也不回走去d細路到。聽到佢係隔離就咁"哦"左一聲。就係想咁，就等你以為自己高高在上，以為怕左你啦~ 我份工雖然"低賤"，但唔會為左一d閒人，被人有把柄係手既，更加唔想教精你，你所做既一切只係係到縱子，第日佢會唔會行x就唔知囉~ 睇你個仔家山有冇福啦~