今日放假，天氣又凍，諗著可以訓到自然醒，點知....阿妹放假，阿媽甩底同埋fd出去飲茶，得番我同老豆， 所以俾人叫醒，出左巿中心好日子飲茶，阿妹男友都係到，飲埋茶先返。

知道阿源最近無咁忙，阿妹又放假，一於打蛇隨棍上，去阿源到做番個免費驗血檢查先！！首先三個人一齊坐綠van去上水，再坐火車返大埔，再坐的士，先至去到大埔超級城！

因為岩岩飲完茶，血脂過高，唔抽得血著，所以拉左妹妹周圍行街，行左出去兩間舖，諗諗下去媽咪睇開間中醫睇埋都好喎！！等左半個鐘，阿源又黎埋，介紹埋佢個中醫朋友我識，肥仔中醫嘛....串串地，應診第一件事望左我塊面先，跟住結果同遲醫師講既差唔多，話我有鼻敏感，內分泌失調。開左5日葯，成為友情價$250。跟住就要開始戒口既生涯....只可以食米粉、飯....菜、魚....忌麵包、蝦蟹、菇、牛羊.....生冷野...湯水......我既人生樂趣無晒！！

跟住返去驗血，第一步係抽血....妖.....靚妹唔係嘛...又話左手搵到血管，但抽唔到，又要係我右手拮多針，唉...終於抽到。但我抽唔到血既左手好痛囉！！抽完第一樣走去驗左血型先，登登澄.....證明我同阿妹同一個阿媽生既！都係 B+！！

跟住其他膽固醇、甲乙型肝炎就要等多幾個鐘先有結果，跟任三個人走左出去行街，吉吉島、書局、周圍走，仲睇左我最想玩既韓國燒烤板...但依排戒口，所以無買到。係大埔既吉吉島好多野買，熟食既種類多過屯門好多，好羨慕呀~仲俾我同妹子見到維記雪米糍，$11有8粒，好似棉花糖咁大粒，自己揀口味，抵~~~好味!!!!

等左成個下午，結於有結果，就係我仲有好多qouta食野！因為我飲完茶2個鐘，膽固醇指標都係4.2..離標準5仲有一段距離丫~yeah!!!跟住甲、乙型肝炎都無反應，亦無抗體，所以呢！遲d要諗諗幾時去打針，源問左佢d醫生朋友價，友情價$400-3支，仲分付我要拉埋我妹去打.....

捱左成個下午，仲要等埋阿源收工，好彩依個太子仔早左半個鐘偷走，我地三個人又返屯門食飯，睇暖爐.....三個人對暖爐一曉不通，最後睇左幾間，都係豐澤買左...攞現貨....個爐超級重！！真係辛苦晒阿源一個人攞兩部去的士站。幫我托左上的士，到我返到屋企爸爸已經準備車仔等緊我架的士lu~

返到屋企，個爐無人掂。我撈埋d電視汁，妹子就打黎話個爐要點開，點點點....佢地兩條友，駛唔駛咁急呀！！