‘老婆!老婆!妳今日想去邊呀?我揸架車車妳吖!’
‘我今日好攰,邊度都唔想去.’
‘唔周圍去唔緊要,我哋喺屋企睇戲吖!我租咗套《無敵破壞王》返嚟!’
‘上次去戲院嘛睇咗囉!我好攰呀!剩係想瞓覺呀!’
‘咁呀!不如妳煮返幾味畀我食吖!我想食蕃茄蛋、雲耳蒸雞、雞湯豆苗浸肥牛……’
‘妖!你想食自己去茶餐廳食啦!咪煩我好唔好?’
老婆變咗啦!
早排佢仲好樂意同我做唔同嘅事,試唔同嘅嘢,一齊去搵寫日記嘅靈感.
到咗夜晚,我就唔可以靈感充沛咁喺Facebook專頁度打一篇日記,呃讚好同分享.
唉!咪以為我寫得好開心,每日要諗唔同嘅題材,仲要翻睇返自己寫過嘅日記,以防內容重覆,有欠新意,其實都幾辛苦下!
你哋以為我真係好似啲白痴港女咁,呃幾個Like就射到成地精咩?其實我都唔想架!.
今時今日,越來越多人補習,亦越來越多補習名師出現,補習社開到成行成市.
僧多粥少,大家都係數自己嘅會考經驗幾咁豐富,教出幾多個拎A嘅學生出嚟.
其實依啲都係自己吹出嚟,你估真係會搵鍾庭耀做民意調查咩?
我哋唔係電視台,政府唔會因為怕補習社太多而唔發牌.
喺依個惡性競爭底下,有大財團支持,有錢賣告嘅補習天王就特別多人識多人揀;
又或者本身靚仔靚女,打扮得型啲性感啲,映幾幅PS過嘅相就可以引到成大班豬扒毒男報讀補習班.
我兩樣都無,遲早會畀人淘汰.
我不斷去發掘低成本嘅宣傳方法,既然我中文底子唔錯,咁不如寫幾篇小說散文宣傳下啦!
我遊遍各個論壇,發現香港目前以高登嘅講故台係最具人氣,近年仲有一個向西樹上春樹成咗名.
我開始睇講故台啲文,先發現原來自己嘅中文根底無想像中咁好.原來我只不過係一個填鴨式教育嘅受害者,剩係識背課本範文,將所有嘢照版煮碗教畀啲學生,想靠創意只會得到’零分重作’嘅評語.
不過,香港嘅市場係好大,而且膚淺嘅人佔大多數.
正如我無法理解嗰啲重貼幾百次嘅無鳩聊貼圖,同埋係人都知嘅愛情金句點解咁多人Like同Share.
只要可以令到啲人懶有共鳴,佢哋就會一窩蜂咁分享,驚死執輸.
既然做唔到最high class,我唯有做最cheap,於是建立咗個專頁,專門分享一啲’感人’日記.
對於我依種已經成家立室嘅人,戀愛上已經無乜浪漫而刺激嘅事,所以最適合分享自己嘅生活軼事,將自己打造成一個完美好男人,先Lum盡一班公主病上腦,要求男人任勞任怨嘅港女,得閒就提下今年係自己嘅幾多週年紀念日,你都知女人最鍾意記住依啲日子.
自此之後,我老婆就成為我嘅智囊,每日絞盡腦汁諗點樣宣傳自己,點樣打動人心,喺Facebook Update日記已經成為我事業嘅一部份.
但係故事靈感都會有用盡嘅一日.老婆已經開始怨我迫佢一齊諗故仔,迫佢一齊度下點樣將用過嘅素材改頭換面.直至今日,佢終於忍唔住發我脾氣.
我自己落太興食飯，遇返上次講故仔畀我聽嘅阿婆.
‘點呀?我個故仔幫唔幫到你呀?’
阿婆笑住咁同我講,但係唔知點解,我覺得自己好空虛,好污糟,開始反省自己依幾個月嚟不斷咁分享故事做乜鳩.究竟有幾多人真係會因為咁而搵我補習.
我好攰,依一日我想休息一下,打少次日記,畀自己做返一日正正常常,順其自然嘅人.
點知我返到屋企,打開Facebook專頁,劈頭就收到一個Message.
‘張老師,你嘅日記點解仲未Update架?’
我好撚想喊,原來我已經擺脫唔到寫日記嘅魔咒.
但我仲係把心一橫,打咗句’休息係為咗行更遠嘅路’
隔咗一個鐘,我再次打開專頁,發現我頭先打嗰句Status已經過萬like.
我戚一戚嘴角,但並唔係引以自傲,而係心諗’你班仆街究竟like乜春呀?’
|
