相信讀者們都經歷過公開試既洗禮，不論會考高考定DSE，都應該考過中文，而當中有一份叫寫作既卷二。我，對佢恨之入骨。

為左避免用字上既爭拗，筆者先釐定自己對「作文」同「寫作」既理解。

 作文：出卷員出定三條題目俾你選擇一條，要係限時之內作出一篇不少於650字既文。

 寫作：題目自定，題材不拘，文體唔洗有太多拘謹，字數同時間不限，想寫咩就寫咩。

我喜愛寫作，但討厭作文。

寫作係一件隨心所欲既事，唔需要計分，鐘意幾時寫都無所謂，最開心既，當然自己既作品或者諗法可以自由自在咁俾其他讀者睇，如果有人認同自己，更加會令自己更有動力去寫唔同既野。

作文？就係一場決戰九十分鐘既考試，不論你寫到好多野，睇既都只係個評卷員。分數決定左評卷員覺得你篇文既質素如何，評卷員覺得你篇文唔掂，你篇文已經俾人大幅貶值。

明明寫作係一件令人滿足既事，偏偏所變種既作文令人不忿。

作文想攞5**？一係寫埋d懶係高深，感人至深既文，或者靠運氣。

可能有人覺得我只不過用吃不到的葡萄是酸的既心態去抱怨，但事實上，我真心唔覺得有d所謂5**既作品有咩咁好，佢地攞到5**，只因佢地既大作假得黎又夠自然。但實際上，內容比放學ICU好假的肥仔更假，所帶出既人生哲理，講就高深，但諷刺地，佢地從來冇經歷過，又憑咩講埋d大道理呢？

好，事實真係有d人寫既野係有料到；但如果運氣唔好，唔好話level4，level3都唔知有冇份；但同時有d人明明文寫唔好，內容又唔可以叫突出，又俾佢攞到5**，吹佢地唔脹！

其實本人完全唔理解某部分評卷員係到諗咩。

內容一般，又話文章普通冇新意。

內容突出啲，不幸的又俾人話誇張。

內容扣哂題，一句諗法不切實際（評卷員的想法）就判你死刑。

內容近乎離題，可以隨時比前者更高分。

內容懶係令人感動有大道理既，評卷員就會狗衝俾佢地5**。

有人話，香港學生既創意一代比一代差；一切多得呢班評卷員，不斷用分數打壓學生既創意。

本來寫作係一個平台俾人發揮小宇宙，激發創意；但寫作所變種既作文就不斷扼殺香港學生既創意。仲記得早幾年係高登見到一篇內地高考0分既文，不過最令人驚奇既係，篇文寫既內容極度寫實 － 刻劃左不少中國既陰暗面。唔知若干年後既香港，作文要攞5**，係唔係要寫「沒有共產黨就沒有新中國」之類既大道理，就可以即攞5**呢？