銀狐：「係呢個波啦。」

 

我：「你比個銀色既波我都用唔到架......」

 

銀狐：「呢個波，雖然你係偷返黎既，但係得你先用到佢，你放隻手上去先啦。」

 

我放左隻手落個波之後，估唔到佢咁高科技，有晒虛擬畫面等等既野，仲自己掃瞄我既指紋同埋瞳孔，最重要係個波會浮空既......

 

我：「呢樣......咩黎架？」

 

銀狐：「其實我都唔知佢叫乜名，但我見你成日用佢黎hack野多，所以我地都叫佢駭客球。」

 

我聽完佢講之後，之後自己摸熟個波點用，係果一刻，我覺得自己好似艾登咁有型！

 

 

我：「嘩，原來呢個波可以做到咁多野既......咁萬一佢無電又點？」

 

銀狐：「拿，呢樣就要問返你自己啦，因為我係唔識點用呢個波既，點都好，總之個波就比左你，我既任務都暫時完成。」

 

我：「咁你點樣返未來？始終差3年都係好大獲，同埋現今既你又身在何方？唔會有影響咩？」

 

銀狐：「放心，現今既我一定唔係香港，因為我唔係香港住架，其實我一直都係日本生活既，不過比阿頭召集咪黎左香港囉∼」

 

我：「咁你又識講廣東話......唉，咁你點樣過夜呀？我屋企無位比你訓架喎！」

 

銀狐：「首先，我無話過自己係日本人，另外，依家香港既局勢，就算訓街都好安全啦，最後，我都係時候要做埋其他手尾啦，有咩事我會再搵你。」

 

我：「你又知發生咩事既......喂，你點搵我呀，你有我電話咩？」

 

銀狐：「作為一個未來既駭客，我要HACK你個部機有幾難？返到屋企睇下Skype啦朋友。」

 

然後佢就一陣風咁閃左......我都馬上返去搵返星仔報平安，不過我比較真係好奇想返屋企開電腦睇下係咪多左個聯絡人，但我既然有個波，我都想試下hack自己，我諗應該仲快可以知。

 

點知想睇佢係咪咁神手hack我加左佢果陣，未來既我就即刻搵我......

 

恨魂說：

搵左銀毛仔攞返個波未？

 

我說：

攞左，但仲試緊點用......

 

恨魂說：

放心，大把機會你用，因為有幾個網站等住你去hack......

 

待續。