上回提要，有條友叫我搵Boss，搵埋佢再搵多個就完成任務......

唉，不過呢條友叫Boss，應該好惡死，都係小心少少先

但估唔到有畫面睇，條友Boss黎，霸氣大叔樣，不過佢應該係未來掛

Boss：「你好，我係孫文。」

我：「原來你叫酸民，個名都幾台式啵。」

Boss：「你誤會啦，唔係酸人果個酸，你有冇聽過鐵拳無敵...」

我：「唔係嘛，孫中山真係識打拳架？」

Boss：「唔洗咁大聲......我都估到你唔係呢個年代既人啦，唔洗接我返去住，我有緊要事做。」

我：「下，但點解你唔係未來都做到視像通話？」

Boss：「你果粒波我都有一粒，廢話唔多講，總之我遲下會返黎同你地會合，你都比部機叉下電啦。」

我：「咁其實你係咪孫中山？」

Boss：「緊係唔係，我只係做佢替身，唔講啦，我要搵人，總之我有事就會搵返你地。」

睇黎都係唔好阻住人地玩民國無雙，不過隔住個mon同埋時空都感受到果股霸氣，真係勁......

仲差一個咋！就試下搵呢個叫駁線既人啦......

條友個頭成個小夫咁，但最爆都唔係佢個頭，而係佢第一句......

駁線：「黎緊啦，你1分鐘前咪叫完我囉，咁急做乜呀？」

我：「我岩岩先搵你架咋喎......」

駁線：「哇你咁快轉左look既！」

我：「其實岩岩搵你果個應該係......」

駁線：「得啦，我明架啦，你同佢講我偷緊車，5分鐘後到。」

總算搵齊人啦......係時候同返未來既我講啦......又要突破MSN既界限啦......

我說：

喂，得啦，搵過晒佢地，係有個玩緊民國無雙要遲少少返黎......

恨魂說：

唔係掛！咁我地依家六缺一呀！第五勇者、星星頭、S、駁線加埋我同銀狐，仲差條友呀！

我說：

打牌呀？要咁齊人做乜？

恨魂說：

唉，無時間解釋啦，你快啲死出去同銀狐一齊返黎啦！

我說：

返黎？！我去未來！？

恨魂說：

係呀，總之你頂住檔先啦！唔好問咁多住！鬼叫有波果個自己係到玩單機，你快啲帶住個波返黎啦！

估唔到依家連我個人都要穿梭時空......

待續。