見得我打blog
證明我又有奇怪想法喇
成日都咁樣忽有幾想
真係唔知係一件好事定壞事
好奇怪呀可?
--------------------
首先緊係分享下經歷先
今日我就完左intro psyc既一份midterm
其實我都唔係好明自己做左d乜
不過重點唔在於呢到
在於midterm之後個個presentation
我同左兩個女仔一組
問題就係出於我好似freeride左成組咁
即使我係份ppt到打左野
都比其中一個女仔插
可能衰在溝通小啦
但我見佢準備左咁多
都無咩點講野跟佢意思咁改下佢
其實重點我係一個好有責任感既人黎
我呢刻唔係自吹自擂
然而我真係有咁既特點
係我高中甚至asso既時候
凡有grp work既野我都係擔當chur人既角色
但點解去到呢一刻我會變成咁呢?
人做freerider我做freerider點解可以做到咁有內疚感呢?
會唔會係我而家真係無咩方向感呢?
入左大學
真係唔太知自己做緊乜
sem two 都已經去左一半
係開sem既時候我比左個小目標自己係要chur下過三爆四
甚至同自己兩個朋友有個小競爭
邊個sem two gpa最低就要請對方兩位食放題
但係去到呢一刻
我到底有無個要競爭既心態呢?
呢個競爭仲要係我提議出黎既
因為我知道人有競爭先會進步
會唔會係我錢太多想做敗家仔呢?
唉~
做咩姐你~
其實我intro psyc份midterm真係無咩點準備過
唔係視gpa如浮雲呀
係直頭好似行屍走肉咁樣
番學都唔知為左咩
你話中學唔洗比學費就算數姐
而家大學係要比錢讀架!
點解要讀得咁無意思呢?
究竟我係想要d咩呢?
come on man!
-------------------------------------
奇怪想法來了
我而家已經二十歲
我成日會問自己一個問題
就係點解自己係自己
我唔知你地會唔會有同樣既問題
但我就成日懷疑點解我自己會係自己既角度去生活呢?
姐係點解我唔可以轉換去使用下其他人既身體去體驗其他野呢?
可能你地睇完都係唔太明我up乜xd
明既~
因為我自己都唔知自己想點
---------------------------------
岩岩睇完左一個甜故
其實重點唔在於佢甜既部份
在於當中女主角既經歷
故事大概係講緊一個草根階層有身材同幾分姿色既女仔去左老蘭做party girl
之後結識左一個40歲有錢光頭叔叔
起初由買賣關係
發展到動左真情
咁故事緊係講緊男主唔要女主啦
咁男主之後又有個機會比左篇文個女主睇
女主自以為自己草根上唔到大位
睇完又再睇
喊完又再喊
其實呢d橋段我係覺得有意思
但我睇過好多了
----------------------------------
睇完之後我都無咩特別感覺
但係個一刻的確有令我引起反思既
當中我真係好中意留封信比女主個個位
因為我好細個就已經試過用文字既威力去感動一個人
我覺得咁樣真係特別有意義
我唔係想講我係個種大仆街
而係我覺得小小既千字文先唔理當中既內容係想中傷對方定點
但單憑宇數而言
我已經覺得係一份心思
---------------------------------
加上之前我睇過被偷走的那五年
當中既女主因為患有腦退化症
醫生要佢每日都寫個簡單既日記
日復日地佢好多野都已經唔記得
對最後佢只可以訓係醫院張床到
用眼睛望住佢既男朋友
其實佢早已唔記得呢個人係邊個
但內心既佢意識到呢個係對佢好重要既人
每日都去探望女主既男主傷心到崩潰唔再講
見到女主最後眼泛淚光咁樣用僅有既眼神去同男主講主動去熄左部維持生命既儀器
試問如果你係個男主
見到自己咁愛既女朋友變成咁既樣
你幫手停左部機可能對女朋友一種解脫
但對你自己來說係毀左一個好寶貴既生命
係個個情況真係無時間你諗
你既思緒一早就已經被激動打擾哂
再次咁提起都覺得好感動!
------------------------------
所以自此我覺得寫日記
甚至打blog都係一件好重要既事
對自己黎講係一件好有意義既事
我係一個中意回憶既人
無論係好係壞
我覺得記錄左
都係一份懷念
偏偏呢個世界當你變成一個成功人士
你好多既回憶
就會變成黑材料
所以我真係好希望自己唔好太出名
穩穩定定既生活可能帶來一個更有意義既ending
我有時真係好佩服一d人可以圍埋三五知己一齊拍片
雖然我無一個好標準既身材
但係係我人生入面好似缺少左一種叫隨意白痴既愉快
我好想利用影像既形式去capture低我呢一刻仲可以發自內心無知既笑容
無知既幽默
因為呢d種種既表情
我相信當我長大出黎做野之後
唔會再有咩機會展現出黎
--------------------
或者呢d只係成長既一部份?
唔通好多野真係上天整定?
我好細個就唔會咁樣諗
我會覺得d人成日話咩上天會幫你安排架啦
你隨緣啦
呢d係命運黎架~
我覺得呢d都係藉口
係你唔敢踏出第一步改變你既人生既藉口
但係無奈地
我係個更無用既人
我只會係到做無限循環既思考
動力呢樣野!
我真係同佢好陌生
我好想有
但好多時我都搵唔出黎
有人話要珍惜身邊既人
往往身邊既人仲依然係到陪你的話
你就唔會學懂珍惜
所以我係夢中試過亡父亡母個好多次
每次我反應都好激動
覺得自己無做得出咩成就出黎比佢地睇佢地就走左
因為我係一位勁考順既人黎
呀哥唔理老豆
細佬又無視佢
我唔理佢最針對係我
但我每次有時間都會同佢飲茶食飯
我打出黎唔係要炫耀什麼
我只係想利用文字去張呢d經歷都記低
--------------------------
但係即使我係夢中反覆咁假設左呢d情況
咁我呢動力呢?
依然都係搵唔到
老實地說!
我懷疑自己真的有精神病了
我快要傻了嗎?
我不求與別人比較
但願有人明白我的情況而不要只回覆一句:痴線佬=]
----------------------------------------
抬頭看一看!
又是另一晚的零晨四時多了
一覺醒來還是繼續做一名有反思的機械人好了
下次再回
|
