原定10月4號先推出o既Bio Hazard6今日偷跑，
代理真識做，趕得切響連假派行貨，普天同慶。
(日水正日先有，仲好似無得爆頭，行版win)
為爭取假期衝進度，即衝落灣仔188買啦，
點知答巴士大塞車，於是響清風街落，
從中央圖書館>維園>希慎道步行落灣仔...
快唔快過巴士唔知，不過肯定無咁悶。
途中SOGO果邊有人派中國國旗，
順便落銅金放個水，見入左好多奇怪音樂game，
有SEGA出o既拍舞機(?)好大部，應該唔平，
仲有KONAMI出o既彈波波節拍機，唔識玩。
佢又會咁捨得落本入呢d機o既？
到188見BH6唔難搵，而且偷跑都$398，抵！
響188仲撞到marc拖住條女，終於見到佢女友。
諗住即刻答巴士走人番去煲打喪屍，
見回程果條線唔多塞，點知呂少打黎佢響銅鑼灣，
咁當然要陪下朋友啦，咁就同佢到誠品潮下聖，
開左一段時間都係第一次去，不過太多人，
無乜格調，而且d書就咁比人任打書釘，
睇到爛晒啦仲買？(下面好多本都無袋包住)
呂少呢排好buy荒木經惟，聽講係專影黑白相。
跟住又過番188、298，298間黃牌店無左，
以後都唔知仲有邊度可以買到software......
然後又落大坑睇舞火龍，我無帶相機純粹陪睇，
今年舞火龍封晒路，唔似幾年前周圍走打遊擊，
即係企一個鐘為左影得果幾十秒，無隱。
然後落自家烏冬食咖喱吉烈豬扒拉麵，好食！
食完d咖喱好口乾，再去貢茶整左杯奶蓋巧克力，
呂少生日月份響izzue買野有七三折，
佢又買左幾件裇衫，我諗住搭埋佢個優惠買頂帽，
點知職員話頂帽係咩cross over紐約帽得九折，
原價都$659九折左都要$600蚊...好貴...
見izzue仲營業緊以為10點，點知原來12點幾 @@