「老豆，我今日約咗班Friend去燒嘢食。」兒子對著鏡子，認真地用髮泥設計髮型，那長長的髮陰總是遮掩著左眼。

「你去啦！我今晚去賭馬。」父親漫不經心地翻閱馬經，吃著花生，道：「今晚有啲涼，小心冷襯呀！」

兒子正想出門，父親卻走在他面前，並把錢塞進他的口袋，道：「頭先贏咗場頭馬，醒你嘅！玩夠就好返嚟啦！」

兒子默不作聲，離開家門。

兒子一行十人來到大美督燒烤，圍著盈盈的火光飲飽食醉、互訴近況，他們最大的共同話題，莫過於數父母的不是。

「我老母真係孤寒，問佢拎少少錢去玩都唔得。」少女一張臭嘴臉。

「我老豆夠係啦！」青年吸了一口煙，說：「一日都黑罵我唔搵工做，老豆養仔天經地義架嘛！等我大個咗呢！唔洗旨意我養番佢。」

適逢好友共聚，兒子本想盡訴一個月積壓的不快，但不知為何，聽到朋友們的埋怨，卻一句話也罵不出來。

「喂！不如玩數字球吖！」少女提出建議，那五男五女立即圍成一圈。

「報數！一！」

「二！」

「三！」

「八！」兒子猶記得八是父親的幸運數字，他曾說過這數字讓他贏下多場頭馬，作為養大自己的本錢，這時他的腦海不禁幻想父親不斷喊著「八號！」的亢奮表情。

玩了一會兒，身邊的男性都借悶熱為名，脫掉上衣，其實是乘機在女伴面前展露肌肉。

兒子沒被朋輩的高漲情緒影響，反而覺得有點寒涼，他記得父親剛才只是穿著一件性感的白色小背心，不知他去投注站時，有沒有添上外套？

「嚟！我哋隊咗佢！」

兒子接過朋友手上的啤酒，即想起父親剛才在乾吃花生，不知父親會否覺得口乾。兒子又看著那些吃剩的雞翼香腸，不知他父親否已經吃飽？

「喂！做乜呀Matthew！今晚粒聲唔出嘅？有心事呀？」少年問著兒子，兒子只是支吾以對。少年又跟兒子耳語：「係未仲掛住Kelly呀？佢上次鬧得你咁金，唔好再諗佢喇！黎！依班睇唔上眼唔緊要，我帶你去酒吧媾女。」

兒子在半推半請下上了巴士，他托著下顎，走馬看花地望著窗外的光景。

巴士在站口停下，兒子瞧見那關了閘門、空無一人的投注站，突然似有驚醒，毅然下了車。

附近的大排檔，父親正獨自吃著蠔仔粥，他把桌上的啤酒一飲而盡，叫喚：「伙記！」

突然，兩枝啤酒重重放在桌上，兒子坐在隔離。

「衰仔！唔係去咗同班Friend玩咩？」父親臉頰有點發紅。

「陪Friend嘅話，乜節日都得啦！你夠係啦！唔係去賭馬咩？」兒子露出微笑，邊斟了兩杯啤酒，邊說：「老豆呀！你知唔知點解中秋節要有翌日假期呀？」

「可能學校知道你哋後生仔依晚一定玩通頂，所以索性定聽日唔洗返學呱！」

「我就話唔係呢！」兒子高舉了酒杯，說：「個個都咁忙，難得可以同屋企人傾下計，真係一晚都講唔晒。」

「衰仔！」父親碰一碰杯，道：「你想傾計嘅，洗擇日子咩？」

「都係嘅……」兒子說：「可能望住個月亮，會覺得阿媽都喺度一齊聽呱！」

父親也看著圓圓的月亮，瞇起來的雙眼顯得格外感性，道：「係呀……唔知佢喺嗰邊，過得點呢？」