由於有同事resign，尋日朝早上司主動向我提及初時有意將我調team，不過經詳細考慮認為我並沒有足夠相關知識，只係曾經嘅計劃但不會實行，我唔明白上司呢番說話嘅用意何在，究竟做乜要講畀我知？有時我寧願唔知道，知道後心情總是有點兒奇怪…

今朝返到office發覺outlook express retrieve唔到email，於是立即向IT同事求救，IT同事在電話告知解決方法，不過礙於我嘅電腦知識薄弱，我完全唔知應該點做，最後要IT同事直接幫我deal with，原來係因為server update過轉咗少少嘢，後來email 操作正常，但email嘅problem引致速度減慢，無論係open 或者 save file都要一段長時間，慣性快手快腳嘅我對住當時嘅情況真係好性急，之後又突然叫我唔好用其中一個software同outlook express，搞到我唔知應該做乜好，幸好有個task只需要利用excel file。

速度嘅問題令我無無聊聊咁浪費咗一個上午，晏晝開始所有program、speed都變得正常，我竟然發覺我要handle嘅嘢唔少，打算叫SZ admin check地址，又適逢其中一個放假，even send 咗上去同事反過來問我有冇時間，我只好話勉強都應該有嘅，於是check地址又降回我手上，做做吓話咁快到放工時間，但我依然感到有頗多duties未完成，hea咗成朝換來嘅係忙碌嘅晏晝。

雖則有嘢做，但我嘅情緒依然存在問題…話說朝早上司去咗聽seminar，當上司回來時我有必要向上司匯報朝早嘅情況，在我想開口時突然有種強烈嘅感覺，迫使我唔想開口，最後只好用MSN傳遞，果一刻我知道自己唔係啞，但情緒影響我去講嘢，錯誤判斷認為對方有情緒，其實有問題嘅係我自己，胡亂猜測真係應該適可而止。