前日係我身上發生左一件十級恐怖悲慘既事，係我呢一生人中最不能接受但又發生係我身上既事！唉.....我真係會有陰影ga！

話說，一朝早出面返工，行到半路感覺到隻左腳突然間痛一下，再行兩步又痛一下，都無為意，

由小腿痛到上大脾都只不過係短短幾秒，心知不妙，摸摸大脾，有隻野..........當時好驚好驚...真係好驚！

諗左一秒，我即刻抓緊有隻野個個位，盡快唔俾個隻野接觸我既皮膚，一步一步咁行返公司，沿途我已經唔理會途人既眼光！

只想快d返到公司！返到公司就即刻搵條衭換，慢慢除下，但仍然抓住有小動物的地方！

之后我將條衭拎俾我公司個清潔姐姐幫我清理，我一邊喊一邊同佢講發生咩事！好可憐。

我完全唔敢睇，到底係d咩黎，我只問清潔姐姐係咩黎，佢話係隻"小強"你唔使驚！

"小強"呢兩個字，對我黎講比起要我死還要慘！