晶：

　　呢兩日開始轉涼，秋天來了，令孤單ｏ既我更加感到一陣凄涼ｏ既感覺．．．各位要小心身體！！

　　開學至今，雖然算有d習慣，但係都係覺得好陌生，好冇親切感．．原來吳祥川無論日子同環境係好美好ga，好懷念吳祥川　ｏ既生活同朋友，中學ｏ既友誼真係好寶貴，可能一世都冇可能搵返咁純真ｏ既友情。好想回到過去，起碼唔駛一早起身趕搭車，之後又早咗成４５分鐘去到，好懷念成日同陳潔跑返學，放學一邊返屋企一邊傾心事ｏ既日子。琴日同陳潔傾電話，感覺真係好似一個老朋友∼好開心^^

　　今日返學，又差d遲到，好彩有個同學帶我行熊貓酒店條路，又係跑返學ｏ既日子，成半年冇跑過喇．．好辛苦！！放學要去交電話費，搵咗好耐先搵到smartone，比人點嚟點去．．．

晶：

　　我覺得如果朋友唔開心而搵人傾訴，應該盡自己能力，耐心咁安慰佢，雖然知道自己唔可能解決到佢ｏ既煩惱，因為就算旁邊d人點幫你都好，始終都要靠自己先可以解決，但係無論如何喺唔開心ｏ既時候，朋友ｏ既安慰同鼓勵真係好重要！！自己係過來人，希望你唔好再唔開心喇！！

　　聽日係專業ｏ既生日，Happy Brithday Ar!!

晶：

　　琴晚同姐夫ｏ既爸爸食飯，之後就同家姐佢地唱K，唱到３點幾．．．其實唔係好想去，好似好曳咁，人愈大就愈唔想玩。皮球都入咗嚟同我地玩，真係估唔到佢會同我地玩咁耐，其實係因為佢有d野煩，所以入嚟同我地傾計，佢同我講咗好多野，唔知佢有心定冇意呢！不過最記得佢話：要放棄ｏ既就要放棄，有d野遲早都會習慣！不過我咩都冇講過喎，點解佢咁感慨？？佢咁樣令我覺得佢經歷咗好多辛酸，有感而發，人生有太多野要經歷，真係好累！！

　　唉．．就係因為咁，搞到今朝遲到，今日體會到原來遲到係一件好易ｏ既事．．

　　夜晚有一個老朋友打比我，好驚訝，原全認唔出係邊個。原來佢一直冇搵我係因為大家之間發生咗誤會，哈哈！咁ｏ既誤會都有ｏ既？？不過再見亦是好朋友^^

晶：

　　放咗半年假，第１日返學．．好不安！！唉原來我d預感都幾準，我睇錯通告，早咗１個鐘返學．．shit！！

　　之後都係好無聊，都係做d例牌ｏ既野∼班房個冷氣超凍，仲凍過冬天，我估得１５度！！之後要選班長同班助，但係阿sir話班助有利是收ga，仲係幾百蚊tim！！所以個男班長為咗$$，同阿sir講寧願做班助∼真係現實！！但係女班長唔肯做班助喎．．之後個阿sir就點咗我做，雖然係有幾百蚊收，但係一聽就知係d阿四ｏ既工作，一定好辛苦．．我寧願唔做喇！！

　　其實個阿sir叫我做唔係咩原因，只係因為佢見到我得低頭，知我唔想做先叫我做．．真係慘！！