（９月２３日－１０月２３日）

大吉星木星響０８年會落入你嘅家庭宮度，為你帶嚟嘅著數就係同屋企人嘅關係會好到不得了，而且全家上下無分輩份都會成為係嘅貴人；另外，家庭宮亦掌管住屋方面，所以亦都意味住響０８年置業方面係有番啲運仔，無論係買樓或賣樓，又或者想租樓嘅天秤朋友都可以受惠，有呢方面嘅計劃，響０８年就要認真啲諗下佢喇！至於壓力星土星，響０８年會移到你嘅第１２宮度，令到你好容易自我膨脹，同身邊嘅人相處時會指指點點，個人主義到爆，脾氣亦變得好大，同往嘅你形成好大嘅對比！要好好留意一下，多啲接受其他人嘅意見，唔好乜野都一意孤行呀！另外１２宮亦掌管小人，有土星進駐此宮，或多或少的小人嘅滋擾都會增加，不過只要抱住開放嘅態度，有咩唔著就講到著，咁都可以安然渡過架！０８年天秤人嘅主星金星係唔會出現逆行，基本上全年都係個好年頭，自己好好把握啦！

事業運~ ０８年事業運屬於中上，冇風亦冇浪，唯一係要留意嘅係天王星會響７月至１１月期間響工作宮度逆行，影響到工作形式會出現費時失事嘅轉變，只要耐心忍耐下，都唔係一個大問題！

金錢運~ 正財運同橫財運都屬於中上，正財運響１月初因為火星逆行會較弱啲，其它日子就完全冇乜問題。唯一要留意係投資運，響１月尾至２月中，好容易誤信傳言而令到你買錯股票投錯資，到咗果段時間記得要做好功課先下決定啦！

戀愛運~ 至於戀愛生活呢，拍緊拖嘅天秤朋友可以響０８年同情人平穩過渡，而單身嘅朋友響年初好容易出現假桃花，睇定啲就好易錯過機會，快得滯呢又會揀錯人，真係惨惨惨囉！

   （８月２３日－９月２２日）

年年都總有個星座要蝕底啲收留粒「不幸之星~土星」！０８同０９年要背負呢個工作嘅星座就係~你呀→處女座囉！其實粒土星又唔係真係咁差嘅，只係佢多多少少都會為落入嘅星座帶來精神壓力，影響到當事人覺得乜都唔係咁順利，睇咩都唔係咁順眼，容易令到各位處女人響呢段時期感染到唔同程度上嘅抑鬱！知不過又唔駛咁擔心喎！只要響呢段時間保持「宜守不宜攻」嘅秘訣，要平平安安渡過呢段非常時期都唔係難事！好啦！講番啲好消息過你聽啦，響０８年大吉星會落到你嘅戀愛宮度，桃花旺到不得了呀！會有唔少條件好嘅對象出現，單身嘅處女人可以將精力轉移到戀愛生活上面！至於拍緊拖嘅朋友呢，因為天王星會響７月至１１月係伴侶宮度逆行！所以響呢段時間容易成日產生分手嘅念頭！要冷靜啲先好啊！

事業運~ 工作運響０８年屬於一般，下半年就好過上半年，而最差嘅時段就響１月至２月中！容易會比啲無聊嘅小人中傷，而影響到你嘅工作表現！宜揾下其他人幫手解决啲問題，唔好諗住自己單打獨鬥就攪得掂喎！

金錢運~ 響３大財運之中，以橫財運就最理想，除了１月因衰衝動而損手之外，其它時間嘅運氣都響度；而正財收入呢，響９月尾至１０月中容易因為自己講錯嘢而無咗個機會！由其係靠把口揾食嘅朋友，講說話時記得要小心啲呀！至於投資運呢，只要響１月尾至２月中提防一下，全年都應該冇乜大災難！

戀愛運~ 唔駛講都知０８年桃花旺到恨死隔離架啦！無論本身有冇拖拍嘅都會有唔少對象主動殺埋身！單身嘅故然之係好事啦，本身拍緊拖嘅朋友就要冷靜啲諗清楚喇！由其響７月至１１月呢段天王星逆行嘅高危日子入面，問下其他人嘅意見再加詳細諗清楚至好喎！

   （７月２３日－８月２２日）

先為各位獅子人報導吓０８年嘅好消息先：大吉星木星會落係你嘅工作宮，意味住響出年各位獅子人嘅工作會非常之順利，稍稍弱啲嘅時段會係木星逆行嘅５月中至９月中，其它日子就強到痺呀！至於唔好嘅消息呢：就係土星會移到你嘅金錢宮度！帶嚟嘅影響當然係直接咁减少咗你嘅正財收入，０８年嘅經濟會有啲壓力，所以千祈咪大花筒，洗腳唔抹腳呀！切忌先駛未來錢，唔好申請信用咭之餘，最好就連啲舊咭都剪鬼埋佢，另外亦都唔好咁輕易就諗住學人地投資呀！記住響０８年，你嘅座右銘就係「忍一忍手，謹慎理財」啊！

事業運~ 得到木星嘅關照０８年嘅工作運就頂呱呱啦！邊個行業嘅獅子朋友都一一受惠，做咩都能事半功倍；再加上事業宮嘅主星~金星響０８年都唔會出現逆行，無論係公司定係同事都對你非常之欣賞同埋信任，總言之一句講曬lucky啦！

金錢運~ 要排位呢，投資運就最理想，橫財運就麻麻地啦！而正財運就頭先一早都講咗，因為受到土星嘅影響會變成問題重重，咪話長氣，真係要提提你唔好亂咁駛呀！總言之下半年就會比上半年好啲，要留神呀！

戀愛運~ 無論係單身定係拍緊拖嘅獅子朋友，響０８年嘅感情生活都冇乜大問題，唯一要留意嘅係拍緊拖嘅朋友，因為１月尾至２月中水星會響你嘅伴侶宮度逆行！容易引起你同情人出現溝通上嘅麻煩！響呢一段時間要多加留意喎！

   （６月２２日－７月２２日）

各位巨蟹朋友真係恭喜曬咯！大吉星木星響０８年會大駕光臨你的伴侶宮度，帶來最大的驚喜就係唔結婚都會同居呵！響０８年，除咗５月中至９月中呢段時間會麻麻地之外，全年同你嘅情人嘅關係都甜蜜到痺，最適宜結束愛情長跑，快啲拉埋天窗，諗諗佢啦！０８年要最緊要注意嘅地方，係凶星土星會響你嘅第３宮度出現！受到影響嘅範圍有：一係同好朋友、兄弟姐妹甚至係左鄰右理都好容易發生爭執、口角，不過呢就唔會動武嘅！就算係對方唔著都要好好地忍讓一下；另外一個影響就係容易禍從口出，即係成日講錯嘢！響呢一年都係少說話多做事，座右銘係「講多錯多，唔講就錯少啲囉」！基本上，０８年都係平平穩穩冇乜大危機出現，放心啦！

事業運~ ０８年嘅事業運平平，故言之冇風冇浪，不過亦冇乜新突破，較為麻麻地嘅時間會係火星逆行嘅１月同埋木星逆行嘅５月中至９月中，其它日子都冇咩特別嘅事要注意，整體嚟講，下半年會比上半年優勝啲啦！

金錢運~ 講到財運方面呢，正財同偏財都冇乜大嘅問題，只要響投資時唔好自己衝動行事亂咁投資，聽下其他人嘅意見就會冇咩事架！唯獨係橫財運就認真麻麻喇！由其係１月尾至２月中，好容易信錯貼士或搭沉船，再唔係就連飛都會唔見埋，唔好響呢方面有咩寄望喎！

戀愛運~ 先頭講開，響０８年嘅戀愛運好到不得了，拍緊拖嘅朋友可以拉埋天窗，同情人關係好到痺！至於未有著落嘅巨蟹人呢！除咗年頭１月冇乜起色之外，其它日子只要肯主動出擊，包保你一定會抱得美人歸呀！

  （５月２１日－６月２１日）

０８年大吉星木星會進入各位雙子人的橫財宮，除了５月中至９月中呢段期間因為逆行之外，全年其它的日子手氣都相當唔錯，而且仲會有好多貴人帶來唔同的好消息比你，可以話輪住塞錢入你袋！如果之前有人欠你錢都未還，記得趁住出年追返啲爛債返來呀！至於大凶星土星響０８年會落在你的家庭宮，最基本帶來的麻煩事就係為你同屋企人的關係帶來負面影響，同屋企人的關係會變得較為緊張，由其響１月土星又逆行再加埋你粒主星水星都逆行！真係兩隻手掌啪啪響囉，所以要多啲忍讓下啦！另外家庭宮亦包括埋住屋，因此連帶０８年置業運都麻麻地！有意買樓賣樓甚至租樓的雙子人都要提高警覺呀！小心啲同精靈啲呵！仲有平時出門口都要記得閂好門窗，檢查下水喉同爐頭呀！最後各位雙子人的水星０８年會響１月尾至２月中，５月尾至６月中同埋９月尾至１０月中逆行，響呢三段期間心情都會受到影響變得唔多好！

事業運~ 大致上０８年的事業運都冇咩大災難，最大的影響都係來自大氣候，好似因為天王星響７月頭至１１月會響你的事業宮度逆行，任職的公司會出現大規模的改變，對你或多或少都會造成影響，避都避唔到；至於工作運呢，就冇乜大問題，可以放心繼續努力啦！

金錢運~ 講到財運，正財收入大致上冇乜事項要注意，反而係投資同埋橫財運就要留意！首先係投資方面，因為水星會響９月尾至１０月中響你的投資宮度逆行，好易因為訊息出錯而招致損失，記得要多啲留意簽署文件又或者利用互聯網時要加倍留神啊！至於橫財運呢，本來有吉星木星照住會好運到爆，不過響５月中至９月中木星會逆行，所以小心會變成一場歡喜一場空呀！

戀愛運~ 至於戀愛運，蜜運中的雙子朋友，同你的情人冇乜風浪可以開心過渡；單身的朋友都會有情緣出現，不過咪開心得滯，事關響９月尾至１０月中，你自己主星水星會響戀愛宮度逆行，好容易因為言語上發生誤會，一係就表錯情攪到好瘀，一就講錯說話攪衰單萌芽中的戀情，要提防下喇！