（４月２０日－５月２０日）

各位單身的金牛人唔好意思咯，響０８年大凶星土星會進入各位的戀愛宮！代表響來年戀愛生活睇怕都係水靜鵝飛，就算真係有都會出現好多麻煩同障礙，尤其係響１月的時侯！不過就唔駛咁灰，正所謂雨過就會天晴啦，只要拎出啲堅毅，努力不懈去面對，捱過初頭的辛苦，都可以抱得美男或美女歸架！要加油咯！另外更加要留意，又係因為土星的帶契，０８年亦好容易唔覺意有咗ｂｂ！唔多想又無計劃的朋友就要記得記得「要大家笠」啦！至於大吉星木星０８年會落入金牛人的進修宮同旅遊宮度，最適用去外遊同進修，如果能夠張兩者合併，即係索性去埋第二度讀書就應曬景囉！總括講金牛人的主星金星響０８年唔會出現逆行，全年的運氣原則上都係好好，真係可喜可賀囉！直頭飲得杯落啦！

事業運~ ０８年的事業就冇乜大起跌，最大問題都係來自溝通上出錯！水星分別會響１月至２月中同９月尾至１０月中響各位金牛人的事業宮同工作宮度逆行！只要響呢兩段期間留意處理文件同埋溝通，相信都可以順利過渡嘅！反而係響６月至１０月尾，天王星會響事業宮度逆行！公司可能會出現重大變化，不過都輪唔到你去諗囉！

金錢運~ 正財冇乜大變化，１月至２月中同９月尾至１０月中會較為波動！唔好亂咁駛錢呀！橫財運就一般啦，反而投資運就要特別注意，唔係太有信心就最好唔好掂喎！尤其係１月至５月頭呢一段時間呀！

戀愛運~ 因為土星的影響，０８年對戀愛運唔好有太大寄望！仲要留意吓有無爛桃花埋身添！尤其係響１月至５月頭，去到下半年都好少少啦！

 白羊座（３月２１日－４月１９日）

響新的一年，最令白羊人又喊又笑的會集中響工作方面，原因係大吉星木星響０８年會去到各位白羊人的事業宮，意味住事業會得到更加好的發展，會得到老闆欣賞，地位亦得到大大的提高，最重要係得到更大更有用的權力，真係可喜可賀囉！不過大凶星土星依然會停留響各位白羊人的工作宮，代表響工作上面仍然係有好多麻煩事，要有心理準備不斷接受挑戰啦！白羊人的主星火星響全個１月都會逆行，影響到運氣同心情變得較差，有咩新計劃或者大决定都唔好揀呢段時間喎！因為死硬架！

事業運~ 好運爆曬燈！有唔同的機會出現，係大家創業的好時機！雖然亦有唔少問題！不過全部都可以逢凶化吉！１月至５月的期間麻煩就最大，要努力克服啊！唔好咁易放棄；如果想創業的話，最好避免在５月中至９月中呀！記得喇！知無！

金錢運~ 講到財運方面呢，全年都冇乜大問題架！當中由其係正財最理想，投資運呢就比較一般喇；而橫財運呢，就會響１月比較差啲喎！千其唔好用賭錢來陶冶性情呀！因為貪字變個貧呢！

戀愛運~ ０８年的戀愛生活就冇乜大風浪，雖然未會有好大的轉變，不過不失為唔錯的一年，唯一要留意的係９月尾至１０月中，水星會響你的伴侶宮逆行，容易同另一半發生溝通上的問題！記得要平心靜氣同另一半坐低好好地傾下喇！咁就會乜事都冇架喇！

 雙魚座 （２月１９日－３月２０日）

大吉星木星會響０８年進駐你的社交宮，響新的一年裡面你可以識到好多新的朋友，最起碼同呢班新的朋友都可以開開心心咁相處，再著數ｄ當然係呢班新識的人入面有好多可以成為你的貴人。會帶畀你好多唔同的好處，無論係邊一樣都好，總之就係響新一年各位雙魚朋友可以叱吒於社交圈子啦！至於唔係咁好的係壓力星土星響０８年會進入你的伴侶宮，會為你同你的情人之間帶嚟唔少壓力，所謂的壓力唔一定係佢對你唔好，可能就係因為佢對你太好，攪到你頂唔順所以做成壓力！雖然係咁，但係都唔好咁易放棄，因為只要可以渡過呢一關，你同你情人的關係就可以更進一步架喇！

事業運~ 大致上都可以平穩渡過，無論係工作，又話者同同事老細之間的相處都無咩大問題，可以安心繼續努力衝刺！要加油喇！

金錢運~ 至於財運方面呢，正財同埋偏財運都無問題，可以放心！唯一要注意的係水星會響９月尾至１１月中響你的第８宮逆行，響呢段期間容易因為溝唔通或者文件的原因而令到有所損失，記得要留神啊！唔好貪一時之快呀！知無！

戀愛運~ 感情生活方面，拎單身同拍緊拖的鱼仔比較，單身的反而仲好，明年都會有唔少桃花，想脫離單身的都唔係無計架！不過拍緊拖的就無咁好彩，響土星的影響下同情人的關係會變得緊張，要好好坐低溝通下喇！忍耐會係你解决問題的最好方法！切記！切記！

 水瓶座 （１月２０日－２月１８）

大吉星木星會響０８年進入你的第１２宮，會為各位水瓶人帶來两大好處：第一樣就係會為你帶來清澈的頭腦，只要你運用得宜，響０８年只要將你的諗法放響有需要的地方就可以做到無往而不利；第二樣就係第１２宮仲係掌管住敵人的宮位，所以有木星落在呢個宮，你就可以趁住響新的一年入面同你的敵人好大機會化敵為友！至於壓力星土星響０８年會落入你的橫財宮，所以千祈唔好亂咁賭錢呀！另外土星落入呢個宮亦會令你容易同其他人發生金錢的糾纏，所以響０８年除非諗住呢筆錢唔預收返，如果唔係的話，都係索性話無錢唔好借比人喇！

事業運~ 響０８年事業運非常唔錯，全年工作運都好好，完全無問題出現，即管放膽去搏啦！至於公司亦都會對你好支持架，唯一係１月較為同容易公司老細發生磨擦！要多多注意，唔好同佢頂咀啊！話曬都係佢出糧比你丫馬！

金錢運~ 財運方面就要注意吓，首先係講正財：因為天皇星響７月至１１月會響你的正財宮逆行，容易導致各位水瓶人因為無端端重整自己的財務而反招致損失，所以唔好身痕攪亂自己個户口呀！至於投資運同橫財運就一般啦！響上半年就唔好輕信謠言呀！

戀愛運~ 至於戀愛運方面呢，單身的水瓶人問題會較多啲！響１月因為火星響戀愛宮逆行而令你熱情得滯，而嚇走對方；到了５月尾至６月尾的時候又會因為水星逆行的影響而攪到你講錯說話趕走咗對方，各位水瓶人要留意呀！拍緊拖的水瓶人就可以倖免於難，同情人就無災無難咁啦！

 山羊座（１２月２２日－１月1９日）

唔駛多講！響０８年大吉星木星會到達山羊座的本宮，一睇就知１２個星座入面明年最好運的一定係山羊座人啦！就算去到５月中至９月中的木星逆行，都唔會減低山羊座人的運氣！至勁係你喇！記得要好好把握呢一年的運氣，有咩新計劃有咩事想試，都可以放響０８年實行！至於凶星土星響０８年會落入你的旅行宮同進修宮，事關土星係你的主星，其實落響你邊個宮位度對你的影響都唔係真係咁差（話曬慣曬啦嘛！），至於落響呢個宮位，會影響到你好想去旅行同進修，但係礙於環境無辦法可以實行到，又或者係去旅行同進修時遇到的麻煩會增加咁解！響０８年你的主星土星會響１月至５月頭逆行，響呢段時間心情會麻麻地，可以張注意力放落其它方面分散吓ｄ悶氣！ 

事業運~ 水星響９月尾至１０月中會響你的事業宮逆行，工作會惹來閒言閒語，好在只要唔理佢好快都會無事，留番啖氣暖吓肚仲好啦！至於工作運呢，因為火星響１月而水星會響５月尾同６月尾會響你工作宮度逆行，所以響呢兩段時期，唔好亂發脾氣，交代工作時唔好怕長氣要講多幾次啊！  

金錢運~ 普遍財運都唔差，橫財同偏財完全無問題，唯一要留意係正財響１月尾至２月中因為受到水星逆行的影響容易被拖數！  

戀愛運~ 無論單身定係拍緊拖的山羊人都無有怕，因為戀愛運不俗！單身的會有固定桃花按時間出現，而拍緊拖的同另一半又無咩大爭執，邊方面的山羊人都可以受惠，真係可喜可賀囉！