今日就照常咁番工啦~但係今日就決定左會辭職,番埋lee個月。聽日同佢哋講。為自己嘅讀書日子而奮鬥!!

約左飄飄,介同肥溫食飯,食飯之後就去番市填公園到坐,吹水。但係以下一件事估唔到發生o係我身上。

我玩緊阿介個psp同飄飄對戰,見到有一個人跑步,隔離仲有一隻黑色嘅狗陪跑,lee下都不以為然,主人同隻狗一齊運動好多時都有...

但係當個男人繼續跑o個時,隻狗突然停低,o係我哋附近行左一陣,之後竟然仲伏左阿介身邊,冇咩動作,亦都冇吠,十分安靜，只係久唔久望下我哋咁,佢個眼神好可憐呀...

之後又發現隻狗狗對耳上面好似生有真菌,一粒粒咁生o係耳仔表面,相信lee個係佢比人遺棄嘅一個原因。

我哋冇理到佢繼續玩我哋嘅,傾我哋嘅阿介仲貪玩叫過佢一聲「小白」,佢真係認!!唔通lee個真係佢個名?但係過左好幾個字之後發覺有d唔妥....隻狗可能係想跟住我哋....我哋嘗試行遠少少睇下佢會唔會跟住我哋行,結果係會!!但係發覺佢好似係跟死一個咁,就係阿介。之後我哋咁多個行開,等阿介自己一個啦,點知狗狗又望住我哋,好似話「你哋做咩唔行埋嚟呀?」咁...到左十一點幾十二點,我哋都要走喇,番屋企,屋企唔養得狗,而且都冇負擔能力,於是都諗辦法甩左狗狗。

但係佢一直一直咁跟住我哋,佢哋兩個男仔就負責引開狗狗,我哋就o係第二條路走先,但係走唔甩呀!佢又再次等我哋...等我哋4個人一齊行,冇辦法喇....一齊行啦~到左輕鐵店上面d樓梯,佢有好幾次行得快過我哋,o係唔同嘅落梯位轉彎...唔理佢又好慘咁....但最終我哋都係襯住佢o係轉角位時就落樓梯走人...個心其實一d都唔好過...見住佢因為唔見我哋而向我哋嘅各方向跑去,睇住佢背影唔見...

但我哋未落完樓梯,佢原來以經落到樓下巴士總站搵緊我哋,佢四周圍咁望,四周圍咁跑....

遠剖睇住佢嘅我哋亦都只好繼續走我嘅路。我哋各自返家,佢哋3個去搭車,我就行路番。

諗番起，佢真係好乖.....同我哋一齊雖然時間少,但係睇得出佢其實真係好純同好聽話....

見佢唔係好污糟,又唔係好瘦,佢可能都係比人遺棄左唔係好耐,佢依然好信人類,但係數埋數埋,我哋可能已經唔知第幾多百個唔要佢嘅人嚟喇...

買得「小白」養嘅人應該一早就要預左負責lee d問題!!點解到左lee d時候要唔要佢??唔健康就唔要佢,對佢真係好唔公平!!有冇諗佢嘅下一步會係點??比人去人道毀滅??比人收養??餓死街頭?定係病死街頭呢?不過唔要得佢嘅人....一早都預左佢有好壞嘅下場,「小白」比人遺棄都已經係一件好傷嘅事...

唔知點講...唉,估唔到lee d咁觸動人心嘅事都會比我遇到....

差唔多番到屋企先醒起我有張入數紙唔記得比飄飄幫我拎番學校....打電話比飄飄啦,之後飄飄同我講,原來隻狗狗o係佢哋上左車之後跟埋上車,唔知係唔係見到佢哋呢?

之後狗狗比人趕走左.....趕左落車喇....之後嘅事有關狗狗嘅,我哋都唔知喇...

但係我希望想養狗狗嘅人唔該諗清楚先做下一步嘅事,要有責任人!!狗狗唔係玩具嚟ga!!

有養狗狗嘅人,一定要有愛心,要對佢好,到到佢最後嘅生命階段!!錫佢哋多d啦!!