係戲院睇，睇VCD，係電視播，唔經唔覺《功夫》呢套野已經睇第三次，周星馳自少林足球後一套比一套唔好笑，搵唔番《逃學威龍》果種由頭笑到尾o既快感。《食神》、《白面包清天》、《唐伯虎點秋香》果種高轉數唇槍舌劍式台詞亦不再。
刻意賣弄電腦特技，可惜做唔到荷里活o既級數，變得兩頭唔到岸。selling point只有周星馳呢個名牌，再咁落去呢個招牌怕且保唔住啦。
要讚o既係《功夫》片中分鏡手法甚考心思，差館一樓pano到二樓、琴音將貓影斷開、神鵰俠侶坐入斧頭幫架車入面等都經過精心佈局，不過官能刺激唔夠佢o既鐵舌功咁深入民心。
係呢...睇左全套戲好似仲未知周星馳戲中叫乜名 =_=
從周生近期作品睇得出佢只想表達自己想要o既野，賺夠啦，賣座與否唔再係考慮因素。《功夫》又大顯主角威能，最尾關頭例開金手指，同《食神》一樣幾乎不勞而獲，無點下過苦功就得到絕世武功，仲要比佢溝埋女，財色兼收，世間最美好o既事莫過於此，係戲中實現晒佢o既夢想。