近日爆發豬流感，搞到食豬肉都驚驚地。
不過食朱古力係唔會感染豬流感，唔食得豬扒就食朱古力啦。 XD
食朱古力有減壓作用，寒冬食更有提升身體熱能之效，
當然都奉勸大家一句少食多姿味，多食好易肥。 (引言？)

小弟向來有鋪食朱古力癮，行過些粉、零食店見有新品種都會買黎試試，
對品賞朱古力都有一定研究，講到買朱古力好睇彩數，
以大路品牌金莎為例，新鮮o既金莎裡面o既朱古力醬係半液體狀，
半徑咬落去將其切開時係有汁尾如尖角般順住牙齒方向掘起，咁為之新鮮，
一般而言銅鑼灣Citysuper、太古城Apita等超市賣o既貨品多屬良品，
某d店鋪保存環景不佳，如些粉、OK，門口長期大開入晒熱空氣，
除非新入貨，不然多數都係劣品，表層朱古力色較淡，裡面o既醬逞固體，
無咁爽口無咁甜，質感差幾個層次。不單止金莎，另一大路品牌繽紛樂亦然，
由於密封式設計，購買時亦無法從包裝睇得出係良品劣品，真係靠撞。