正式發售期為2月26，不過早兩日香港已有水貨偷跑。
在下就正日先落手，3000蚊連上下mon貼玻璃膠殼，
以官方定價25000yen黎講，日元高企，連運費3000算合理。
當晚本來落188睇下有無人display出黎，結果係完全無，
睇Game書或上網睇片都無辦法睇到3D，d人唔想做白老鼠，
對所謂裸眼3D無信心，如果有得親眼目睹強勁o既表現，
打左枝強心針，d貨去得仲快。不過衣家都唔驚擇貨o既，
頭一個禮拜幾多都實賣得晒。
唔係買花讚花香，個人認為裸眼3D o既表現絕對滿意！
以前傳聞話玩緊果陣望下個鐘幾點再望番個mon會無左3D，
玩過後係唔會有呢個現狀，望番落個mon度3D係即時持續。
而3D絕對唔係幾層紙版咁簡單，係分得出有弧度o既輪廓，
而且影像亦能超越個mon前面，唔係只係mon入面有層次感。
點都要彈下，打斜或側望都係無左3D見到鬼影。
舊電3個鐘就用完唔多掂，可以叉電o既時間仲耐過玩...
另外試過上下掉轉睇3D無任何問題(唔會凸變凹...)
係home畫面有個icon有枝筆浮左出黎，呢個位好出色！
果一刻真係有種夢幻o既感覺，好似入左魔法世界咁。
既然一早有呢種技術，點解唔應用係電視方面？
而仲用d咁累罪o既3D眼鏡，店員話sharp為左要出3DS先，
等3DS賣左一定時候先賣電視，個人認為...係o既，
如果豐澤一早有裸眼3D電視display真係對3DS大減神秘感，
不過電視市場同手提機市場無抵觸架，sharp會為左一棵樹，
放棄個大森林？根據玩耐左3DS終於明白個答案，
3DS係要係特定距離範圍下，雙眼同螢幕成一水平對正，
先做到3D，手提機就易姐，電視唔通長期坐正中間睇咩？
家庭樂果陣一家幾口迫埋同一格階磚？再講，電視尺寸大，
跟難控制到左右眼o既視角範圍，所以暫時都唔易。
Game方面有Ridge Racer、街霸4、戰國無雙、任天狗等，
Ridge Racer眾Game係最貴，我就買左街霸4，呢隻一直想玩，
反正又無xb360或ps3，pc又唔夠力，要唔洗入錢玩到得3DS，
(相信對於已有家用版SSF4 o既人黎講，3DS版購買意慾唔大)
一入Game滿心期待o既開機畫面居然係2D認真殘念...
都知到唔用joystick實賴野，好在3DS個十字掣算好過PSP，
起碼斜下果d都o禁到，但都唔太好chok，當為想入門啦。
畫面方面絕對唔會差過PSP，好唔好過單憑隻SSF4難以定論。
|
