上次激讚吉野家o既忌廉三文魚煎雞飯，
唔好以為我係網絡打手。
因為今次就要彈同樣係吉野家o既親子煎雞餐。
睇佢個宣傳硬照，賣相好吸引，
鐵版煎雞+d菜類再籠罩住金黃色o既蛋碎，
45蚊係貴左d，但咁靚唔試唔得啦，
點知實物係塊鐵版放左煎雞同d野菜，乾淨淨，
加個碗仔裝住兩舊生雞蛋，你無睇錯！係生雞蛋！
整爛個殼可以倒d蛋黃汁出黎...心諗點呀？
一碗白飯，仲有一碗好似稀釋左o既燒汁液體，
倒d燒汁落去無「炸」一聲，無料到喎，
我再用手指掂下塊鐵版(高危，小朋友切密模仿)
真係唔多熱，好在我無倒d生蛋黃落去，
唔係全碟都唔食得。好啦，只好用d煎雞送飯食，
食到一半有個員工過黎「哎吔未比個爐你」
我心諗你唔好等我食完先比個爐我？
跟住比左個單人邊爐o既爐燒慶塊鐵版，
再倒d燒汁、蛋汁落去先「炸∼∼」
等左好一段時間先出現類似硬照個樣出黎。
不過出黎比錢食飯，就係唔想自己煮，
搵專業o既廚師煮出黎，d味道最到火侯，
衣個餐咁個款要DIY，仲要唔知d野幾時熟，
又要等，煲太耐又會燶，唔值囉！