到左五月又到辭職高峰期，因為D人知道調整左o既薪酬，
再決定去留，有得升職或人工加得多o既人可能留低，
無得上位o既人就無謂浪費多一年時間，趁後生搵過第份。

Gigi早過我入黎呢間公司，係一個有品味o既少女，
有車牌，去日本旅行都有響當地租車渣o既體驗，
又有去學柔道，感覺上佢每一日都過得幾有意思。
我間中都有睇佢響我地公司雜誌寫o既專欄，
寫D生活小品事，讀完的確會令人會心微笑，
例如有篇寫響入境處影証件相果刻，職員要佢嚴肅，
為左醞釀情緒心入面幻想自己唱緊國歌 XD
又有一篇寫自己翻開本磁石貼o既摺頁電話簿，
搵番失散左o既小學同學屋企電話，
好緊張咁鼓起勇氣打電話過去o既經過...
再睇番公司其他編輯，連編者話都要四個大字...
「恭喜發財」或「今期休息」或無題貼張相就算。
佢上個禮拜走，問佢之後o既去向，果然不出我所料，
真係打算去working holiday，好符合佢o既style，
祝佢o既青春每一頁都繼續碇放光彩。

另一個走o既係Mathew，少有同我傾得兩咀o既同事，
工作心態積極，一個有energy level o既人，
亦擁有頗靚o既女朋友，其實算係半個人生贏家，
識佢都知佢男兒志在四方，呢間公司無可能留得住佢，
走係遲早o既事，不過比想像中快(佢應該未做夠一年)
走果日佢送左本大開運比我 =_="'