食飯時通常都會創作一D短篇故事，
有時諗到D熱血o既題材會異常開胃，
今日用膳時即興創作左呢個連鎖快餐爭位記，
靈感係黎自放飯時間想搵個位都難，
有個好燥底又好武功o既男人一個人去食飯，
入到一間連鎖快餐見周圍都坐滿人，
好不容易見到一個o岩o岩空出黎o既單丁位，
就求其放低手上份報紙以示霸位，
然後出去買飯，買完飯拎住托盤番黎，
嚇見原本霸左個位已經比人坐住仲食緊飯，
男人問：「我份報紙呢？！」
食緊飯o既人話叫執檯亞姐掉左啦~
男人好無奈咁雙手渣住盤野但無位又食唔到，
男人怒斥：「呢個位我到先個喎！！」
食緊飯o既人：「邊個知呀？慢慢等過位啦」
男人等左好耐都無空位，越等越火滾，
一手將自己盤飯丟落地下，飯碗都掉爆，
然後將搶左佢個位條友d飯亦撥埋落地下，
d刀叉、可樂、餸菜、汁液散落滿地，
大叫：「我無得食你都唔洗旨意有得食！」
而搶位之人亦非善男順女，爆粗大叫賠錢，
相方繼而動武，展開一場龍爭虎鬥，
男人一個迴旋踢，對方閃開踢爆後方玻璃，
對方拎起座位向男人拋過去，男人亦避開，
擊中背後其他用膳o既人，店員報警，
兩個爭執o既人都驚警察黎到會招惹麻煩，
各兵分兩路閃人，警方來到拉唔到人，完。