新耳機Jabra Revo入手，暫時就幾方面報告比大家參詳下~

--音質方面--
個人認為中規中舉，整體比monster beat solo有過之而無不及，
bass比ultrasone hfi-780更突出，但其他表現略嫌不及hfi-780，
都係果句，聽mp3姐，我個人對音質高要求唔係太高。
響imac用藍芽播放時唔知點解音質較含糊。

--電量方面--
一直以為藍芽耳機無顯示剩番幾多格，預唔到幾時無電，
又或者諗住叉電但唔清楚入面d電滿唔滿，驚叉爆，
呢層真係少擔心，原來一連上iphone就有show幾多格電，
唔洗額外裝apps添，個耳機聲稱可以待機10日，
我叉滿電長期連住藍芽唔熄掣兩日左右就得番3份1格電，
唔知佢個待機10日係咪指熄左10日之後開番仲有電呢？
叉滿待到兩三日我覺得合格，正常唔用果陣熄左佢架嘛。

--外觀方面--
造工紥實，左右兩邊個伸縮位用上金屬物料摸落去有冰冷感，
關節位亦工整，渣上手無monster beat solo果種玩具感。
如果佢兩個裝飾圈位會發光夜晚帶出街就型到無得頂！
要彈o既係cup耳仔個外殼用左類似橡膠質地，雖無損高貴，
怕日久會受熱溶到變黏性或龜裂(唔敢肯定會唔會咁)

--操作方面--
佢用輕觸式調較大細聲，個idea係就係幾cyber，
但用起上黎唔多方便同埋唔知扭到咩位囉，
所以都係響電話度較大細聲。

--連線方面--
初試iphone袋褲袋播住歌會間唔中窒，以為距離遠唔夠力，
但響廳播緊出奇地居然行到入廁所都仲收到，不過都斷斷地。
可能係行走果陣響褲袋搖晃影有干擾，渣上手比較安定，
做實驗試下imac、macbook、iphone同時開藍芽連落耳機，
係唔能夠同時播幾首歌 XD

佢仲有個專用apps可優化音質，可惜要iOS6.X以上先用到，
我部iphone4唔敢升iOS驚拖慢部機，無機會試真d... :(