開心水族箱同廠出左隻新game叫俠物語，
整左個推廣活動只要響俠物語達到指定條件，
連續登入5日、完成某任務、男/女角色達25級，
就可以響開心水族箱得到特別裝飾品同特別魚。
查實要達標都要響俠物語磨上唔少時間，
響活動截止前我都拎到2個裝飾同小龍女魚，
男角我都超過25級但佢無比到楊過魚我！-_-凸
講番隻game，以facebook game黎講，
算做得有心機，起碼角色有動作，人設OK，
場景有分layer移動緊有層次感，亦幾華麗。
好多手機apps facebook game都係定格硬照炸，
D立繪出招又係咁打死佢都係咁，要玩家腦補囉。
支援同其他玩家對戰，叫做有野同人鬥下，
不過其他對手都係同你一樣樣o既複製人...
最唔gur係佢迫你第一次同玩家打要硬食一敗仗，
緊係輸硬啦，走上個雷台度個個都高Lv過你，
(唔排除有人課金買晒神裝逆天角色可以贏到)
不過以facebook game黎講嫌佢系統過份繁複，
每件裝備要鍛治，晒左錢鍛高佢後又派套新裝比你，
搞到都唔想投資太多落裝備驚到咁上下又有新野，
修練內功要元氣，元氣要去雷台或天梯同人打，
科技升級又要閱歷，每個配角又要額外升級，
升到咁上下又開放新角，搞到又唔係好想升角...
跟住又有主線任、支線任、打塔、經商、耕種、
捉奴隸、運鏢、劫鏢(呢隻不如叫賊物語啦)
咁多野搞，開一開game都要o禁足十零分鐘，
查實呢D facebook game只係想攝下時間用姐，
響公司蛇王o禁兩野，唔想咁認真玩，
唔好水蛇春咁多野要搞，不過隻game人氣唔掂，
我facebook個friend list入面一個都無玩俠物語，
連有活躍玩開水果D都係無玩，我都封左game，
o岩o岩開入去睇，哇離線6天獎勵有幾十萬送，
仲話最多可60天？姐係變相鼓勵D人唔好登入？XD