面相有分思想形、運動形、享受形，大部份人都兼具兩種形態，
咁我一定係思想形+享受形，從食一個早餐可以分析出黎。
響M記叫左個3號早餐，係煎蛋、麵包、漢堡扒、薯餅加杯野飲，
點樣將一個平凡o既早餐食到有如宮廷御用九大簋咁豐富？
就係靠思想形o既特質~腦補，拎起個膠刀切一忽蛋擺落口，
再切一忽漢堡扒放入口，即時諗到可以試下蛋+漢堡扒一齊食，
然後就蛋+麵包一齊食、薯餅+漢堡扒一齊食、薯餅+麵包等等...
心水清o既都睇得出呢個早餐只係將一個豬柳蛋漢堡拆散黎擺，
即係將蛋同豬柳夾番入個麵包入面就可組裝一個豬柳蛋漢堡，
不過將佢分開黎細味品嘗，又可以食到唔同o既味道，
再加上隨餐附送o既黑椒粉同埋幼鹽，點鹽同唔點鹽已經唔同味，
一個唔洗30蚊o既餐估唔到有唔止30種食法，勁過錦繡多味魚。
當然，仲要有享受形o既思維先可以享受到呢個食法，
同一個餐，有D人只係用黎充飢，有D人食出趣味，睇你點睇。