食飯時通常會創作一D短篇故事，
有時諗到D熱血o既題材會異常開胃。

廣告畫面出現一位空手道達人，無堅不摧，
木版、鐵通、石頭通通可以一擊破壞。
好多人覺得呢個廣告誇張失實一笑至之，
一位黑道大佬坐監，佢忠心手下為左救佢，
去拜空手道達人為師，呢位手下天資聰敏，
係習武奇才，不出幾個月就習得呢種武藝，
專登犯法比人判入去監獄去救老大，
老大愁眉「連你都入埋個堂口仲有邊個睇住？」
手下話「放心啦，我一定救到你出去！」
佢地先視察監倉內地理環境部署行動，
趁夜晚戒備無咁深嚴，就一拳打爆個鐵閘，
然後帶佢大佬走出外面，守衛聞聲而至，
佢續一擊破，然後走到埋牆一拳打爆，
逃脫出建築物外，亦有唔少囚犯跟埋走，
同D下屬裡應外合，出面準備好van仔離開，
亦準備多幾架載埋其他囚犯令社團多左D新血。

警方睇番閉露電視都感到驚訝，
居然徒手就能破開銅牆鐵壁，
諗起空手道達人個廣告，就上去佢武館，
請佢番差館問話，想查探犯人下落，
達人唔知佢地去左邊，警方覺得佢知情不報，
就拘留佢超過48小時，呢位達人見唔對路，
覺得自己無犯錯，無必要比警方扣留，
於是又破開鐵閘離開，警察慾加阻止，
達人霸氣道「呢個世上無人能夠阻止我！」
然後堂堂正正步出正門，眾多差佬都押佢唔住，
用手扣扣住佢亦一chok即斷，警方束手無策，
只好叫「你再敢行一步我地就開槍！」
達人並無理會繼續前進，警察只好開槍，
只見連子彈都打唔入佢肌肉傷唔到佢分毫，
達人完全無視警方行番自己武館。

呢個消息上晒各大報章頭版震撼全港，
自此空手道達人o既武館桃李滿門。