大部份4月番都播左5集左右，可作出深度小小o既評價。

食桌之靈
據聞係接響4月謊言完結後播出，女主(?)cv都係種田梨沙，
對4月謊言意尤未盡諗住睇呢套舒緩下(個諗法當然大錯XD)
故事以伙頭智多星之類o既廚藝競技為重心，
講述男主幸平入讀全國第1料理學校o既奮鬥史，
當然唔少得類似伙頭智多星對美食o既浮誇表現，
但以更性感手段著筆，品嘗美食要高潮、爆衫、觸手play，
女角全裸(巧妙遮重要部位)不在話下，連男角都要裸體......
都係走熱血路線o既，都係睇男主開掛將敵人囂張o既臭臉，
1個個擊倒得到爽快，感覺男主能馴服女主之時就係結局之時，
唔知女主係咪最後大佬呢？有蠟過較後期劇情o既漫畫版，
女主依然仲係高姿態o既敵人。

御神樂學園組曲
繼BRS、陽炎project後又1首原本係v家o既歌動畫化，
陽炎仲未睇唔知啦，不過BRS同呢套動畫化劇情都係9唔答8，
係唔係只要首歌出名(其實都無聽過)就可以亂安故仔上去都有人睇？
未睇動畫前本來對女主人設感覺尚算討好，睇過動畫後，
我都未試過會對1套作品o既女主角咁反感！厚顏無恥程度令人噴飯！
根本係披住少女軀殼o既痴漢，就算女對女咸濕可合理化，
都唔洗淫賤到咁o既地步架？根本就係為百合而百合，
有時d作品都係但求爽快唔洗用腦睇姐，睇女主開下掛都唔係壞事，
不過開到第2場就輸左比星鎖學姐又係睇到kick住晒唔爽，
暫時比較有吸引力o既女角只有星鎖學姐，but都係棄番確定。

在地下城尋求邂逅有錯嗎
睇劇名感覺係胡鬧作品，以為好多Q版、角色望鏡頭吐糟之類，
但睇落去又比想像中認真，符合正規王道劍與魔法世界o既感覺。
故事講平傭男主響地下城(就當RPG果D迷宮啦)比少女救出險境，
(我都想呢個少女係女主，但睇個勢唔似係)自此暗戀呢個少女，
為左追女由1無是處o既能力開掛以驚人(算係掛)速度進步，
不過響男主身邊有個無乜用o既女神(應該係女主)支持佢同迷戀佢，
而呢套作品裡面所謂o既神靈多數都係1堆幾低能o既白痴......

小長門有希的消失
由涼宮春日的消失(唔係憂鬱係OVA版)演化出黎o既平行世界故事，
角色設定係參照涼宮消失入面比長門改變左o既世界為主，
全部人變番普通人過日常，只係呢度o既虛係無SOS團o既記憶，
要從新認識過涼宮，睇劇名長門應該霸左女主之位，
老實講我認為長門都係涼宮憂鬱入面處變不驚無口熟性有魅力得多，
呢套o既長門只係個內向內弱無精神o既女仔，毫無吸引力，
第3話涼宮正式出場大放異彩，呢套入面涼宮雖然保持正傳果種亂來，
但性格修正得令我對佢好感度再上升到另1層次！多左幾分柔情，
仲會安慰敵人，朝倉話涼宮「意外地係個M」睇得好愉悅 XD
劇情算無聊但會追睇，劇情絕對唔係重點，我更期待涼宮o既活躍，
果然要有類似涼宮咁o既女仔(唔計佢係神呢個設定)1齊先有意思，
充滿幹勁，好多鬼主意，現實有無呢種感覺o既女仔呢？諗起小艾 XD
睇到呢度真係幾接受唔到虛同長門CP架，我只接受涼宮！
暫時做左5話都仲正常世界，唔知會唔會後期又加番科幻設定落去呢？
最近因為呢套又搵番以前o既涼宮憂鬱動畫補元番(跳住黎睇)
講真之前動畫版真係搞臭左涼宮系列個朵，2006年果套次序亂晒，
2009年果套無盡8月loop足8集，其實佢做3集乜都夠晒啦！
搞到我朋友蔡記都對涼宮系列動畫版無晒信心，
不過套涼宮消失OVA(兩個幾鐘)係堅好睇，雖然文戲多，
但完全唔會嫌悶，亦感人，作畫水準仲比呢套小長門消失高！

終結的熾天使
4月番中我覺得呢套係最值得睇，無論人設、世界觀、作畫都高水準，
小長門要建基於有睇過涼宮系列先推介。
呢套講某地區突然比吸血鬼統治，男主逃出吸血鬼地獄(?)出番地面，
努力習武(?)從軍誓要為佢基友(?)報仇，不過原來佢基友仲未死，
仲變埋吸血鬼，睇黎日後男主要同佢基友兵刃相向，大致係咁，
吸血鬼大佬(暫時係啦)係超氣質o既貧乳少女大讚！(心)
佢係第3代真祖掌管吸血鬼界o既王女，萌系奸角格外有魅力，
OP見佢轉住圈咁跳舞好感度1秒爆燈！好期待佢o既活躍！
不過睇佢o既立場應該都唔似可以同男主有乜發展架啦，
而且蔡記睇到最新漫畫版都話呢個吸血王女唔多出場，殘念。

血界戰線&神槍斯托拉塔斯
除左終結熾天使外仲有呢兩套都係科幻舞台o既戰鬥作品，
血界戰線d人設的確萌唔起來，男主仲要長期咪住眼得條線果隻，
呢種眼神明明只係配角先會有o既設定居然用響主角度？
神槍就係SQUARE ENIX套街機槍game動漫化，
但人樣崩壞得同原設判若兩人，搞到女主(?)睇落都唔多順眼。
呢兩套目前都只係睇左1話所以唔深究住啦。

靈感
又係比封面美少女吸引而睇，估唔到係鬼片，不過氣氛唔太恐怖，
講女主係陰陽眼已經見鬼當食生菜，但佢身邊d同學唔多like，
部份靈體造型唔討好，例如咒怨咁o既白臉細路，又或者得對手，
故事發展唔太令人期待，所以睇左1集就無睇落去。