是日乃呂少大喜之日，其實有d唔想佢咁早結，
同輩o既1個2個都結左婚對自己黎講亦意味住響起警號，
以前就話佢都未結佢又未結慢慢黎都未遲丫唔洗急，
衣家同輩間未結o既都所剩無幾不得不開始著急啦。

講番婚宴，我都係夜晚7點幾到步，無參與之前o既活動，
幾年前都笑言講過唔想做兄弟，睇番佢地d花絮，
果然被女家玩得幾狼背，又要披住件肌肉道具帶豬鼻、
著草裙跳舞、又做埋d奇怪指定動作，好似玩獎門人咁(笑

諗住會見番好多以前d同學，點知得王建築師同陳生兩個，
雖然仲有艾文果d，但其實未同佢同過班，仲有亞風同大隻，
真係比想像中少，本以為剩係中學圈子都可以坐兩圍架嘛，
好多應該會黎o既都無黎，例如兆偉(飛左去日本)、黃雀等，
以前呂少有參加過佢地婚禮o既都無黎到。

自問自己都算係橫跨呂少最多圈子o既人，
中學啦、正形啦、IVE啦、珠海啦、art center啦、道教啦，
但入場簽到果度係完全生面孔(仲問我係男家定女家)
我將人情交左比佢地(見仲有位師兄弟都咁做我又跟住做)
諗諗下有d唔放心添，黃建築師同陳生就醒啦，
佢地親自遞交比呂少本人。

跟住巡例播雙方童年相片、宣誓、向雙方家長敬茶等，
然後就大家食野，今次呢間d侍應幫你畢好晒先上檯，
唔似得之前食過果d碟大野擺檯中間，然後先族個位畢，
明明每次都細細碗，仲要有幾味我都無食到，
但都食到個肚好脹，又破戒食左蝦，佢細細碗炒飯，
居然放5粒蝦，出面d茶餐廳1大碟都係大約放5粒蝦炸，
衣家都驚皮膚病又發作。

聽朝又要早番工，所以到11點左右同陳生先行告退，
佢地應該仲繼續隊酒，alan醒目，渣住條車匙，
就係最好o既免酒金牌，講起黎今個禮拜都連續出7日街，
好在黎緊禮拜3公眾假期可以好好休息 XD