得知會有呢件產品果刻，的確有動搖到我學日文o既意慾，
萌生「有左呢部野，仲學外語做乜？」o既諗法。
不過諗深層香港人最須要用到o既日文唔係講，係聽同睇，
除非去日本旅行，唔係o既話講呢part真係最少用得著，
講比邊個聽姐？你有日本朋友咩？
聽方面，正如尋日提及，睇日劇唔通下下o禁停等部機翻咩？
除非部野可以做到同步翻譯啦，但我相信就算科技幾發達，
都無可能做到同步翻，除非發展到可以直接連繫大腦神經，
或者可以感應到腦電波之類，唔同o既語言文法次序都唔同，
就以中文同日文為例，中文o既「因為」、「雖然」擺句頭，
日文就擺句尾，有可能全句意思o既轉捩點就係最尾個字眼，
唔聽晒全句都唔能夠正確掌握到內容，又講，中文動詞擺前，
名詞行後，日文普遍相反，仲有，同1個音好多時有唔同意思，
例如聽到書展其實想講舒展根骨，聽到色心原來後面有栽陪，
跳樓後面有腰舞、過左新後面有加坡、睇佢沖涼後面有茶，
如果只聽前面就譯意思可以南轅北轍，所以同步幾乎無可能。
查實呢種技術唔係應該早就有啦咩？手機無呢d翻譯apps咩？
iphone都有析別語音o既機能啦，要做到有幾咁難？
部翻譯機結構亦唔見複雜得去邊，只要1個收音位1個播音位，
我諗最值錢係個翻譯程式姐，1直以黎d電腦翻譯系統都9唔答8，
google就係個好例子，如果佢做到自然o既翻譯，
根本整個apps裝響任何1部智能手機都搞得掂，
隨住去日本o既中國旅客激增，部野響國內市場應該好有潛力，
遲d仲可以crossover埋初音版(反正都係機械聲)之類仲吸金呀！
不過件野新出就話得意姐，如果日後真係普及左，
個個遊客都渣住部機講1句然後等佢發出d怪聲，
相信對方會覺得好煩，做呢件事亦唔會好睇得去邊，
商業上應該都唔接受用咁o既方法傾生意，好無禮貌咁，
比著我係老細都係正正經經請番個翻譯員好d。
|
