細個肯定有幻想過未來o既遊戲機，
會係仿如自己置身現場咁o既體感玩法，
似乎呢種技術不久將來就面世，
目前各大廠商都積極開發呢個方向，
以今時今日幾可亂真o既遊戲畫面，
係值得期待，遊戲界會踏入新o既次元。
最近有隻以SAO入面o既NERvGear命名o既VR機，
聲稱就係SAO現實版，其實就算做到虛擬實景，
都仲係同SAO差幾皮，SAO果舊野係接通大腦，
用思想去操作遊戲，呢樣技術睇怕50年內都未必有，
但係自己做乜角色做乜o既話就唔難做到，
只係場地問題，有機構整4D迷宮(似主題公園d鬼屋咁)
個迷宮只係好單調o既淨色牆，只要配合埋個眼罩玩，
要置身魔界秘境冒險都唔難，仲連1定程度觸感都做到，
起碼行到埋牆真係有舊野頂住你先啦。
有過山車係帶住眼罩玩，畫面類似坐住架星戰d戰機咁，
1邊橫衝直撞1邊射怪物，連離心力都做埋。
咁呢種技術咪只能響主題公園玩到？
有更平易近人o既方法o既，企係個類似跑步機上面玩，
咁就應該響屋企都玩得，但對寸金尺土o既香港黎講，
要響個窩居擺部跑步機咁o既野真係唔係人人得，
睇黎短期內都難以普及，只好寄望響街機玩到啦，
街機本來就係要玩1d響屋企或家用機做唔到o既野，
不過本港時下o既街機業......唉，算把啦。
另外就算做到咁，都應該好難模擬到觸覺呢樣野，
更加唔好諗點樣呈現受到攻擊o既痛礎感，
至於聲音方面就無問題，幾年前3DS隻迷惑館已做到，
帶住耳機聽，d聲音真係做到從後面或頭頂傳來咁，
如果做埋觸感，VR咸game應該有好大突破 XD
仲有體育game，以後唔洗湊夠腳先可以落場踢波啦。
呢種機器仲要響密室玩，唔係比其他人睇住晒好異相，
畫面淨係玩家睇到，旁人睇住條友好似鬼上身咁 XD
不過VR真係普及後可能引發唔少社會問題，
例如d人太沉迷虛擬世界甚至已經分唔清現實，
又或者因為太迫真令玩者受驚過度甚至搞出人命？
試諗下對畏高症o既人黎講整個畫面係由高處跳落去，
都米話唔刺激。
|
