關於9大行星，以前小學科學有讀過下(好似係，除非唔係)
但對呢個概念更有印象o既係來自美少女戰士果 XD
不過2006年冥王星已經比mike brown踢出9大行星行列，
我地所處o既太陽系只剩番8大行星，到今年1月，
mike brown又宣佈發現新o既第9行星，
唔知呀武內直子係咪有須要改1下冥王剎那個名呢？
衣家d小學生通識考試應該答太陽系有幾多粒行星呢？

本來發現新o既天體對天文愛好者黎講係件值得開心o既事，
但nowtv引述英國太陽報引述亞肯色大學教授維特邁爾話，
呢粒新o既第9行星可能會引至古柏帶o既碎冰塊撞向地球，
懷疑6000萬年前呢粒行星就係恐龍滅亡o既罪魁禍首，
而最嚇人o既1句係有科學家話災難最快4月底就黎料！

查實維特邁爾早響1985年提出過planet X理論，
地球每2700萬年就會出現1次物種大滅絕事件，
推測係1粒未知行星每2700萬年經過古柏帶所導致，
果陣仲有另外兩個假設，1個係太陽仲有另1個姊妹星，
1個係太陽o既垂直震動，其後呢兩個推論都被否定，
淨番planet X理論。

首先，翻查過相關資料，新發現o既呢粒第9行星，
同維特邁爾形容o既planet X無論質量或公轉週期都唔吻合，
甚至維特邁爾都講過呢粒第9行星唔係planet X，
太陽報只係斷章取義將planet X理論格硬套入呢粒第9行星，
唔係未知行星就係planet X架，唔好有鬚就係老豆先得假！
第2，有科學家話最快今個月底就就黎料，邊位科學家呀？
唔講名都講下邊間學府或邊間研究所o既科學家丫！
恐龍滅絕係6000萬年前o既話，如果滅絕週期係2700萬年，
(咁即係恐龍滅絕至今之間己經再經歷過兩次物種滅絕？)
喂除唔盡喎，理論上距離下個滅絕期應該仲有2100萬年丫！
時晨有排都未到，以人類科技發展，唔好話2100萬年後，
比多人類2100年相信都有足夠o既技術去排除呢個災難啦。

mike brown亦講過呢個新o既第9行星唔會對地球有威脅，
你睇到有o既話大概你睇左蠢文章，再講丫，
planet X理論只係有認受性炸，唔代表1定正確，
我又退1步咁假設啦，就算呢粒第9行星係planet X，
只要唔係呢幾千年內有威脅，及早發現都並唔係壞事，
咁樣先可以鎖定目標對正下藥，防範於未然丫嘛，係咪先？

呢個謠言係黎自太陽報(香港東方報業旗下果個已經摺左)
查番關於呢份報章o既wiki，雖然係英國最暢銷報紙(好似係)
但編採手法被評粗糙、哇眾取寵，對象係低學識水平讀者，
所以文章唔會經過審慎檢定吹得就吹，果然呢d8掛媒體，
先至受歡迎，分分鐘呢d危言聳聽報導1個月唔知出幾次，
唔係吹到迫在眉睫話2000萬年後先出事邊引到人關注丫？