究竟我地對身處o既太陽系有幾多認知呢？
以前小學讀科果陣或許有基本o既概念，
例如地球圍住太陽轉，仲有9大行星等等，
而1套美少女戰士加深左對行星o既印象，
最近翻查開有關外太空資料o既wiki，
原來好多野都唔知，只識d好表面o既事，
睇下以下o既野你地又知唔知？

恆星同行星
用廣東話教呢樣都幾混亂，恆同行同音，
行星係圍住恆星轉(聽落即係邊個圍邊個？)
地球、水星、金星、海王星等o既就係行星，
太陽就係恆星。

天文單位同近日點
1個天文單位即地日距離(地球同太陽o既距離)
通常天文學會用呢個單位黎講天體o既距離，
例如土星就係距離太陽10個天文單位。
近日點即係天體最接近太陽o既點，
有近日當然亦有相反o既遠日點啦，
天體並唔係以太陽為正中心黎公轉，
有d近日點同遠日點可以差好遠，
地球算係差唔遠，近日果陣就係夏天，
遠日果陣就係冬天。

小行星帶、柯柏帶同歐特星雲
小行星帶係火星同木星之間o既碎石區域，
柯柏帶就係位於海王星以外o既碎石區域，
d碎石包含冰塊，柯柏係發現果1帶o既人名，
所以果度就以佢個名黎名命。
曾經有人以為柯柏帶就係太陽系o既盡頭，
非也，柯柏帶之外仲有個歐特星雲帶，
都係1堆碎石區域啦，範圍大約有2光年，
果度先係太陽系o既盡頭，
亦即係太陽引力所影響度o既範圍。

彗星同衛星
1直都將個彗字讀左做胃(有邊讀邊嘛 XD)
其實係讀睡，查翻日文發音都係讀sui，
如果唔係又多個同音就更混亂，
衛星就係圍住行星轉o既(例如月球)
其他行星o既衛星通常都用番個行星名字頭，
再加個衛字同數字，例如木星第2粒衛星，
叫做木衛2，土星第3粒衛星叫土衛3咁樣。
彗星就係1舊石塊或冰塊，有極多粒，
來沿係古柏帶或者歐特星雲o既碎粒，
當中出名o既係哈雷彗星，公轉約76年，
其軌道到近日點果陣響地球可用肉眼睇到，
遠日點o既時侯遠到去海王星果邊，
對上造訪地球係1986年，下次係2061年。
彗星無固定體積，事關佢飛(?)近太陽果陣，
會比太陽蒸發左d，亦因為咁可以好短命。

黃道面同赤道面
黃道面即係圍住太陽轉o既軌道平面，
8大行星幾乎都係響同1個水平面公轉，
並唔係1個打橫1個打斜1個打直咁轉，
(之前以為係咁，其至以為斜度會變添 XD)
赤道面就係以地球為軸心自轉o既平面，
赤道面同黃道面並唔係同1個水平，
係打斜o既。

矮星同矮行星
雖然太陽係恆星，但亦屬於矮星類別，
矮星仲有分好多唔同顏色o既種類，
例如紅矮星、棕矮星、黃矮星、白矮星等，
矮星唔1定做到主序星(太陽就係主序星)
例如棕矮星就屬於質量太低o既次恆星。
矮行星只係果d唔夠資格做行星o既天體，
但都有1定份量，稱之為矮行星，
之前冥王星曾歸類為9大行星之1，
到2006年比人降格左做矮行星。

系外行星同類地系星
所謂系外行星就係太陽系以外o既行星，
類地行星就係類似地球o既行星，
d人相信類地行星有可能孕育生命，
有機會有外星人/生物或者適合人類居住，
目前發現其中1個系外類地行星，
係距離我地約4光年以外遠。
光年咁遠，人類有無機會觸及到呢？
聽講目前已經研發出光帆o既飛行技術，
原理係靠光力去推動帆布咁上下o既野，
可達到20%光速咁話喎，有機有機。

太陽系同銀河
我地o既太陽系只係響銀河入面o既1角，
銀河入面仲有好多其他太陽系，
銀河外面仲有好多其他銀河系，
人類係幾咁渺小？人外有人天外有天。