未入正題前先講下自己玩鐵拳o既資歷，
我係由初代開始玩起，果陣係玩playstation1版，
街霸我都無玩過第1代(第1次接觸已經係2代)
果陣鐵拳1好多隱藏角色覺得隻game好充實，
雖然好多都只係換個名同外觀就當係另1個人，
當年鐵拳d角色建模做得比virtua fighter圓滑，
當然衣家睇番果陣d畫面梗係好肉酸啦，
而十連技亦玩得津津樂道，對鐵拳1高度評價。

第1代咁正第2代梗係繼續玩啦，
新加入風間準、雷武龍(成龍)等角色，
果期d立體格鬥game都偏向寫實型o既搏擊，
但鐵拳2有噴laser魔鬼/天使都算前衛，
真心覺得2代建模無咁圓滑有少少起角，
不過起碼d角色無初代咁多換湯唔換藥，
果陣覺得白頭山d踢腳踢得堅型！

第3代係有玩架，不過印象無頭兩集咁深，
應該最大印象係加入風間仁同埋綾曉雨，
同埋建模又圓滑番d。

第4代就無乜印象，呢代應該係出響PS2，
可能係我比較遲買機o既關係錯過左呢集，
最多只係落機舖出下十連技過下手癮咁，
聽講呢集家用版有横向動作模式，好充實。
無記錯o既話4代開始有出2vs2版，
即係揀兩個角色出去打可以打打下換人。

第5代果陣我響遊戲機中心打工，
當時日日睇人打，同事又打，令我重投鐵拳懷抱，
呢代開始我1洗以前用十連技屈機o既膚淺觀念，
較深入研究邊招確反邊招中段之類o既系統，
嘗試記熟每個角色o既動作同判定，仲出十連技？
比人撥開就任人魚肉啦，呢代開始玩air combo，
吊住人響半空打先無得反抗。

第6代又係停玩左1代，呢代畫面無乜大躍進，
加上呢個時期已經對格game無以前果份狂熱。

到第7代啦，今日先出家用版，畫面亦唔覺躍進，
最爆o既賣點應該係有豪鬼，仲1開始就有得用，
d招都係同街霸1樣咁chok波chok升 XD
而最吸引我o既其實係支援VR(PS4版限定)
靜係個換衫模式有得用VR睇已經值回票價，
仲有個VR battle，可惜只支援練習模式，
同埋無得換場景，更美中不足o既係無第1身視點，
唔排除日後DLC會追加番，諗諗下如果有第1身VR，
比對家吹飛個畫面都應該幾頭痛下 XD
雖然無第1身，但都可以較到個角色響旁邊咁，
好似同佢並肩作戰，仲有得較慢動作。

衣家玩落覺得捉唔番個手感，可能因為無joystick，
都幾難出招，連招亦好容易亂，經常記錯指令，
因為角色閒閒地都80幾招，又121、又122，
(1=左拳、2=右拳、3=左腳、4=右腳)
差唔多咁，好易唔記得呢個指令係邊個動作，
招o既timming亦掌握唔到，經常甩招，
好無癮，蔡記仲話等我online同佢打，
我衣家咁o既狀態都係米搞啦。