呢隻game系統同手遊相性好夾，早就應該出落手遊啦！
要衣家先黎出，之前玩過3DS版，玩法差唔多，
都係不斷收集素材黎賣錢或整野，然後佈置屋企之類。
任天堂可能唔係好識利用課金制黎賺錢，
玩到目前為止都唔覺得有課金o既必要，
0課金都好come玩，登入1次隨便玩都無左半粒鐘，
不過唔排除日後會出課金專用o既裝備，
或者將你架車改裝做直升機(純綷胡亂猜測)
除左收集素材之外另1主要玩法係誘拐d動物黎你個營地，
要誘拐亦要達指定要求，包括該動物好感度達到某等級，
要製作(持有)特定家具，每隻動物都唔同，
製作家具亦要等時間(有d等3分鐘有d要3個鐘)
未擴充前1次只能製作1件家具，等果件整完先可整第件，
目前最高擴充到同時製作3件，呢d位都消秏你唔少時間。
衣家仲有聖誕event，製作指定聖誕家具可以得到獎品，
例如聖誕帽、聖誕服等，不過最好有策略性咁整，
我1開始亂整整左棵聖誕樹先，用左d聖誕素材，
然後先發現整個聖誕木牌(?)先可以得到件聖誕衫，
要係咁解動物d委托先草番d聖誕材料整番個聖誕木牌，
其實要拎晒d聖誕活動獎品應該先整果d會回番材料比你o既，
例如用20個材料整個禮物山，整完會回番20個材料比你，
咁就等同零消秏。
呢d自由砌積木game當然仲有唔少另類惡搞玩法，
我就整左好多鐵圍欄將誘拐番黎o既動物困住 XDDD
建造不正常動物研究中心，可惜無d刑具之類o既家具，
唔係1定將營地變刑場，日本推特果邊亦有人有類似玩法，
甚至有人拎到動物張車頭相再加d白色鮮花，
整張床(有動物訓響上面o既話)整到變靈堂。
我d朋友通常都好正常向o既玩法，
好用心咁將個營地佈置得好靚好華麗。
|
