超強颱風山竹將會響聽晚登陸本港，
天文台罕有地早1個禮拜就宣佈會掛8號，
呢個被喻為世紀最強颱風，又話11號風球，
今日只係1號戒備訊號，陽光普照，
可能就係所謂暴風雨來臨前風平浪靜。
見唔少店舖玻璃廚窗都用膠布貼米字，
響商場入面間大家樂都貼(商場反而無貼)
網上消息更指1卷膠紙炒到50蚊以上，
唉，呢d趁火打劫o既舖頭輸晒口悲囉，
除非間野租約期滿打算下個月就摺姐，
唔係o既話d街坊都長期抵制佢，何必呢？
我放工經過樓下間JHC都真係無晒膠紙，
睇住有人問店員有無膠紙賣店員答無，
樓下間百佳亦比人掃晒d屈臣氏精漏水，
部份杯麵貨架亦將近清空，我亦影左相，
幫公司整左篇搶購恐慌o既facebook圖，
不過，呢個係假像，又未至於掃晒，
同區o既7-11或偉哥都仲有大把杯麵賣，
就算百佳無精漏水都仲有其他飲品囉，
我係有心就角度只影d清空左o既貨架，
拿，網絡假新聞就係咁樣做出黎啦！
幫公司做野姐，唔係咁邊製造到話題？
再講，打風頂多1兩日又唔會打足1個禮拜，
你估日本果d大地震咩？洗乜掃貨丫？
公司附近某屋院上年比天鴿洗禮，
d樹比風連根拔起剷起晒，地磚都爛埋，
今次都仲未識驚，唔見有咩特別防風措施，
最多係搵3枝竹頂住d樹，不過又係o既，
可以做得d乜丫？唔通將d樹收晒入貨倉咩？
我就無做任何防風配套，窗口亦無痴膠紙，
我唔多信痴果兩塊咁簿o既膠紙會有咩幫助，
窗口對面亦有大廈檔住，阻到唔少風壓啦？
亦唔見對面住戶有貼膠紙，個個大安旨意，
d無敵海景豪宅就驚啦，準備禮拜1掃玻璃。
|
