繼尋日買到心頭好，番到屋企都夜啦，
第朝仲要番工，所以今日放工先開波砌，
仲去家品店買左張幼磨沙紙同埋鐵線鉗，
呢次有準備架生，會砌得專業d啦，
唔驚扭d散件扭到手指痛或者出血，
1黎就砌MD呢隻朱羅忍者影衣版。
砌砌下先知原來無買到個鉗同沙紙係做唔到，
例如d接合位比個湯口頂住晒合唔埋啦，
呢d情況就要搵沙紙磨走個湯口先可以合埋，
更大獲係d圓形活動關節位，如果比個湯口卡住，
根本轉唔到，有d散件要好大力先可以合到，
以我人手去唔到果個力度，個鉗又太利，
用黎壓應該會刻左條痕，原來個鉗可以掉轉用！
反方向無利口位(個鉗柄設計仲有包軟膠)
全靠呢個軟膠位幫我壓合左唔少合唔埋o既零件，
點解MD呢個模型反而要用架生先砌得到？
明明FAG果隻Architect我途手就可以砌完，
只係好多礙眼o既湯口位姐，無卡住去唔到下1步驟，
係好運買到盒啤得靚o既？定FAG本身比MD設計得好？
砌完，朱羅忍者o既顏值真係完全拋離之前隻FAG！
只係其實配色無想像中咁靚，明明網上睇好cool，
實際砌出黎因為幾個分色部位顏色太接近無變化，
所以好dry，響未貼轉水貼之前其實唔夠sharp醒，
但我又無貼水貼經驗，而且d湯口位亦好un眼，
未處理好d湯口之前都唔會貼住，只能夠咁樣。
理論上朱羅忍者影衣隻沉色係氣勢更凌勵，
試問上戰場o既戰士點會著到紅當盪？
但最大缺點係部位分色太近似分左等如無分，
如果唔貼水貼整體的確係唔多開胃，
其實最好係果d黑色部位換番原版隻白色，
cool得黎又有層次感，丫，點解網上無人咁玩？
係咪要買多盒原版先玩到？其實又唔洗，
勁果d模型達人自己上色添，想要乜色都得。
好啦，講下同係壽屋旗下o既FAG同MD有乜分別，
雖然同廠但d野好多都唔能夠亙換，
例如髮型同臉蛋o既設計兩者係1凹1凸，
唔好諗住將FAG塊面套落MD，相反亦唔得，
而成品FAG個樣比較細路但居然比MD更高大，
腿部接位又係1個凹1個凸，無得亙換，
腰部FAG係柱體插入胸部MD係球體，
可動性就MD贏晒FAG啦，MD腰部可以屈曲，
可擺到類似灣腰動作，肩部更多個可動關節，
將手臂交叉擺都好自然，據說明書講可以換頭，
係MD換FAG頭，佢有額外跟個頸部關節比你換，
但FAG就無呢樣野，應該唔能夠套到MD頭落去，
but個頸部關節勁實，好難拆出黎，唔係好敢換，
如果唔換個關節呢個球形大細唔同套唔到。
|
