雖然我係鐘意ACG野，但係好多年都無去C3，
主要係唔想同人迫，而且我未宅到果個程度，
對上1次去C3好似係以半個記者身份入場，
果陣幫以前公司本動漫雜誌採訪影相，
有聲優show仲可以企記者席光明正大影相，
仲做埋編輯寫埋稿添，算係1次寶貴經驗 XD

由於最近有玩模型，玩開隻壽屋香港好少有，
上網睇過C3好似都有攤位賣壽屋野，
咁就去睇下，話唔定買到平時買唔到o既款，
抱住呢個希望就冒住落雨天都出發去C3。

今次響些粉買飛，30蚊印張無圖案o既條碼單，
入場果陣比門口職員用紅外線掃到就入得，
當時係晚上7點左右，唔洗排隊直入，
只係入到去某d攤位有排長龍，
bandai野佔好多，周圍都見到高達模型，
SAO都涉獵幾個攤位，木棉花又見到，
角川又見到，Aniplex又見到，
比較意外o既係bilibili擺幾大個攤位，
估唔到大6公司發展ACG都幾不遺餘力，
到8點就有綾野真白唱歌成為全場焦點，
大部份人都堆晒埋大台位，其他攤位都少左人，
本來要排隊果d都唔洗排隊就入得，
所以都係等呢d歌姬出場果陣先買野最好，
唱歌果陣好大堆fan屎拎晒營光棒打call，
動作都算1致，我自問真係唔識呢尾野啦，
綾野獻唱同時另1邊廂亦有無名氣o既素人表演，
亦有少量粉絲支持住呢d素人唔洗對空氣唱歌，
講真，部份業餘表演者亦靚女有水準，
可惜佢地撞正大名星上台時段，既生俞何生亮。

講番主要目的，想搵壽屋產品，行雲全場，
得1檔有，果檔亦唔係壽屋專櫃，只係有賣姐，
的確搵到平時無o既幾款，但無我最想要o既，
嘛，既然有咁稀有o既貨點都買番1盒支持下，
職員仲送左張紙模型，摺埋係貨櫃箱黎o既，
回程見落幾大雨，張紙模型差唔多A2咁大張，
你估我可以完整咁保住張野唔濕番屋企？
所以掉左，而盒模型好在我有帶定個大膠袋，
將盒野放落大膠袋仲夠位可以捲埋，夠防水。

結果此行只係買左1盒模型咁大把，都算慳家，
我見有d人有買所謂特別版黑白色悟空超西4，
咩野特別版？根本係無上色，擺明搵笨 XD