呢套無乜人留意o既原創1月番12話播完啦，
我睇開o既臉書粉專都無乜人對呢套野留言，
(相對其他作品每集留言量都十幾廿個)
但係我好鐘意呢套野，正經o既戰爭背景，
加上討好o既人設(女角)完全正中我杯茶！

不過呢套野之所以無人問津亦唔係無原因，
除左唔係咩野人氣輕小說大作改篇之外，
最關鍵o既第1話未能帶動高潮容易令人棄番，
第1話只係乳臭未乾o既細路以模擬戰同人比試，
最多只能展現到作品o既機設同戰鬥演出，
但咁樣唔足以吸引人留低，連我都吸引唔到，
我之所以會睇階因我第1下接觸o既唔係第1話，
而係look開facebook無意睇到第6話o既開頭，
槍林彈雨o既戰場後yuni受傷臥病床1幕，
令人意識到戰事o既無情，先開始從頭睇落去。

第1話王女優姬有個青梅竹馬o既男朋友約書亞，
諗住呢位疑似男主o既約書亞係王女o既守護騎士，
點知第2話就瓜左，比小圓o既學姐死得更早，
明明佢只係腰部插住粒碎片，唔似會死得人。
兩話交代出睇落和平o既兩國其實係交戰狀態，
跟住就到另1女主角stela故事線，老實講，
初接觸stela覺得佢係唔係輕度弱智果隻，
設定佢係無感情，任何事都會表露笑容，
例如佢前隊長死左佢都係望住塊墓碑笑，
我對呢d傻傻地o既角色無乜太大好感，
但後來佢展現英氣o既1面同埋慢慢有番感情，
再交代埋佢童年比後母欺凌o既過去後，
完全對佢改觀，變左全劇最有吸引力o既角色，
跟住落黎都係梅花間竹咁交代兩邊o既故事線，
王女果邊就太天真都令人睇得唔耐煩，
經常都諗住放過敵人會令對方唔再攻過黎，
你咁唔忍心開拖就唔該行開比其他人統領軍隊啦！

到12話王女去啟動1個可以廢晒d能原o既裝置，
令所有戰爭o既兵器全部失靈去停止戰爭，
去到呢集stela先至同王女正式接觸，
而不論睇OP亦或宣傳圖王女同stela好friend，
我仲好期待明明兩方敵對點發展到情同姊妹？
其實係無乜交情，只係stela無阻止王女o禁掣，
雖然戰爭結束之後仲有交代佢地再見面，
都係打聲招呼咁大把，然後就結局，
結局前有佢地內心讀白「呢個係兩個女仔o既故事」
明明係波蘭壯闊o既戰爭，死左好多角色，
講到變兩個女仔o既故事？笑左。

王女身邊o既監護人其實係stela親生娘親蕾拉，
多年前意外而失散，佢仲以為stela響意外死左，
stela就因為咁樣無家可歸先投靠敵國軍隊，
呢個舖左咁多集o既伏筆響12話兩母女重逢，
心諗唔會係stela親手殺死佢親生娘親掛？
作者未黑心到咁o既地步，重逢後天花版倒塌，
蕾拉救親生女而死，但stela都唔知果個係佢亞媽！
其實呢1幕真係全套野最美中不足o既地方！
stela認唔到佢亞媽架？就算要增加悲劇感整死蕾拉，
都唔緊要，但蕾拉死前又無表明身份，
起碼都要叫出stela個名令佢奇怪點解知佢個名丫！
連最尾都唔畫1下幕stela去拜呢個救命恩人o既墓。

整體係好淒美o既故事，但12話集數太少，
可以整長d，最少都整番兩集講王女同stela相處丫，
個OP好多誤導位，除左stela同王女o既交情之外，
仲有stela同約書亞交戰，其實應該係無交戰過。
呢套野同高達唔同，d機似乎好難爆炸，
睇戰爭場面好多時射跌架機唔係射爆架機，
理論上架機應該無乜事丫，起番身再打過囉。
不得不提o既係套野好多畫得崩壞o既位，
例如人樣啦、身形比例啦，係，套套都有崩架啦，
但呢套都好覺眼，好在focus響角色身上唔會崩，
如果角色只係企響旁邊做佈景果陣經常崩左 XD