尋日都出鄰近購物商場o既連鎖電器舖睇電腦，
豐澤睇座檯電腦得1款，其他全部notebook，
而果1款睇落個spec好似好弱雞咁樣，
我問個sales乜衣個年代無晒座檯機電腦咩？
佢話係呀，衣家d notebook勁過檯機架啦，
我印象中notebook係比較唔夠力同埋唔夠穩定，
都幾年無留意電腦野，唔通時代已經變遷？
諗諗下又好似係，我d帶notebook番工o既同事，
收工帶埋部野走，話擺公司佢屋企無電腦用，
我whatsapp問下其他人係唔係咁樣，
得到大多數o既答案係，個sales想昆我姐，
佢間野得notebook賣，咪話無人用檯機囉。

再去穌寧睇，有多幾部勁d o既檯機spec睇啦，
但係i7最平都要過萬，係lenovo o既，
10年前買i5，5年前都係買i5，唔通衣家仲i5？
好想轉部勁d o既，心目中價位大約8千樓下，
因為5年果部i5(即係壞左果部)都係5千蚊左右，
本來諗住今時今日5千蚊可以買到部i7啦，
唔係咩？今日普通o既電腦勁過上年最勁果部，
今日最勁果部出年都變古董丫嘛，事實唔係囉，
i7都仲係高企1萬蚊？i5仍然係6千蚊左右，
呢個價錢比例同5年前有乜分別姐？
出左咁多年應該上到i20啦？仲係i5i7o既？
以前intel d cpu型號都經常轉，又486又奔騰，
anyway啦，今日再出旺角電腦中心睇埋砌機先，
經常聽人講同等價錢砌機比廠機高幾個規格，
我影左廠機個spec執藥咁跟足呢d野砌幾錢？
諗住最少應該平兩至3千掛？佢話差唔多，
頂多平兩舊，下？平咁少我仲砌機黎做乜呀？
我想要o既大約係i7、16Gb ram、GTX1660、
256Gb SSD、2TB HD跟埋win10咁上下之嘛，
8千蚊真係執唔到咩？其實呢期唔係好敢花錢，
香港武肺疫情搞到公司開唔到單唔知涯到幾耐，
如果唔係我都唔介意出夠1萬買部勁d o既。

跟住又去睇番廠機，旺電有間聲稱HP專門店，
佢地居然有部i7係滿足晒我要求只係8千蚊，
仲話係新出o既連平時show spec張桌布都未有，
美中不足o既只係部野無藍芽無wifi要另買，
不過諗住睇多幾間先，然後又行番去豐澤，
旺角o既豐澤係多好多檯機款，睇過d價錢，
i7都係要過萬，佢地有做HP但係無頭先果部HP，
好啦，決定番番旺電間HP專門店買果部野時，
果間野已經落左閘，買唔到，我唔想白行1趟，
唯有再去第間睇啦，百老匯我係未睇過o既，
因為見佢地門口有人渣體溫槍check過先比入，
唔係淨係發哥，我都好憎比人用槍指住個頭，
不過見旺角果間中門大開(應該係職員行開左)
咁我先行入去睇，有部acer都係8千樓下i7喎，
我想要o既都有齊，係爭在獨顯係GT730，
同埋得8Gb ram，有GT730都叫做有好過無丫，
就呢部啦！我第1部電腦牌子就係acer，
之後砌機外連續3部都係HP，重投acer懷抱啦。

買完就即刻截的士番屋企，響樓下附近落，
幾好，拎到番屋企都唔算辛苦丫。