當初睇呢套o既原因只係因為伊娜好靚，
就係單純比人設吸引左，咁咪睇下囉，
又係泛濫o既轉生異世界番，轉o既形式？
唔係比貨車撞(普偏)、比刀插(史萊姆)、
去完便利店買野(Re:0)、睇書(盾勇)、
而係食食下飯就轉左去做個5歲細路啦，
咁佢5歲之前o既過去呢？無，1黎就5歲，
跟住佢發現佢響呢個家庭只係排第8，
即係最細，8男呢個名就係咁黎啦。

又比佢好有魔法天份，然後名師指導，
跟住16歲報讀勇者學校，當時已經好勁，
響果度交到隊友，解決高難度討伐任務，
比皇室睇中，封佢爵位，從此要風得風，
要後宮有後宮，最尾仲取代亞哥做領主，
全個故事大浪就係咁上下。

比較意外就係作品入面o既人幾反常態，
讀書時期佢以為比人睇唔起遭到排斥，
其實相反，係佢太勁個個都想同佢組隊，
但d人又自覺高攀唔起而唔敢接近佢，
呢度估佢唔到係幾有趣，但之後就幾白痴，
不論男女個個都想痴埋去主角身邊，
主教(?)送個聖女比佢，聖女又lur飯應，
佢將條女帶入後宮團，其他女樂意接受，
無任何妒忌之情，伊娜仲自知做唔到正室，
甘願做妾，呢個心意係無比主角知道o既，
只係佢同另1後宮談吐之間透露出黎，
明明伊娜顏值係女主角level但淪落路人，
TOZ搶左女主個位o既小松未可子都有今日，
(TOZ羅潔同伊娜都係小松未可子配o既)
後來宮中大臣又送多條粉毛斧頭女比佢，
本來睇外觀都唔差，可惜性格弱智，
都係伊娜呢種正正經經o既女最高，
男主完全無主動溝過女，d女自動送上門，
作品亦帶出中世紀o既婚姻係父母決定，
亦交帶男主其他亞哥結婚前都唔識得條女。

男主個領主亞哥反而好介意男主搶佢領主，
慳d啦，人地已經過住窮奢極侈土豪生活，
會貪圖你個爛鬼村落o既領主之位？
事實上男主係無貪圖，但皇帝想佢咁做，
因為要有男主o既財華先開發到d土地，
旨意個廢柴亞哥咩？

個OP幾特別，1開始係普通話唱到歌劇咁，
唔係字幕我都聽唔出以為係德文俄文之類，
然後先係正常唱番日文，OP出現好多角色，
睇落都賊眉賊眼，原來大部份都係好人XD
OP亦透露左聖女o既正室地位(人物o既企位)
嘛，聖女唔係好差，但真係唔夠伊娜靚XD

總結，完全唔推介呢套，劇情好格硬黎，
會覺得好多舖排都係非必要性無意義存在，
例如做乜要轉生？不如直接響呢個中世紀，
講有個5歲細路好有天份黎開始咪得囉，
做乜要8男？想話佢最細3男4男都得架，
隨非每個亞哥都有表現出充份o既價值啦，
做乜送條斧頭女比主角？嫌戰鬥力不足？
其實聖女o既出現都唔係好大意義架啦，
感覺作者純粹為增添後宮而添後宮，
如果佢地經歷1段蕩氣回腸o既相遇，
之後先1齊咁就好好多。