酒泉日本料理 (元朗)

 

 

 

約舊同事食飯，大家都想食日本野，有人提議酒泉，於是就黎試下。

個晚我最早到，所以付責等位，差唔多七點，門口已經好多人，等左三十分鐘左右先有位，舊同事剛到，時間真係啱啱好。

三個人，叫左八樣野，其中三樣係特大壽司。 三文魚壽司，真係好大！好味！ 有機三文魚壽司，又係好大！我無食，同事話同平時食開D一樣。 蟹子沙律，超大，青瓜好新鮮，好多蟹子同蟹柳，不過太多沙律醬，食到底有D酸。 南瓜同蕃薯天婦羅，啱啱炸起好熱，無好油，算唔錯。 鰻魚卷，無乜特別。 燒青魚，好大條，見到咁黑本來好失望，點知去皮後入面好JUICY，好好味！推介！！

仲有叫左八爪魚壽司同三文魚刺身，唔記得影相，前者無食，三文魚刺身好肥美，厚切，正！

我地食得慢又加上吹水，成三個鐘先走，其間侍應不停幫我地REFILL茶，亦沒有趕客行為，讚！

D野好食，份量又足，有服務，唔怪之得要等位啦。