森堡美食 (天水圍)

 

 

 

好耐無黎森堡食野啦，日日都爆場，費事等位。

佢個下午茶又幾年前嘅十九蚊漸漸加到而加二十四蚊，D款式無變，都係個D餸，粉同醬汁，不過二十四蚊一個焗粉加杯飲品，今時今日都算平。 是日揀左豬脛肉，蘑菇，米線+沙爹汁。 天氣凍時食D熱喇喇嘅野特別好味，個醬汁咸咸地，唔似沙爹味，不過上面D芝士溶哂真係好正！再有芝士粉任落，已前放係枱，而加要問先比，侍應態度頗惡，要扣分，不過總括食物係好食嘅，豬脛肉配蘑菇好夾架。

飲品叫左熱檸茶，枱上無糖，又係要問，不過我一向唔落所以無所謂啦，檸檬有四片，味道OK，無特别。

服務基本上係零，如果你要求要多張紙巾或要杯水都會比既，再加上D侍應成日都大呼小叫，好吵耳。

環境相當擠迫，小小一間鋪入面有九張方擡，一張圓擡(門口)，基乎連轉身都唔得，由期而加換左有椅背既凳，迫上加迫…

黎呢道，真係純為食野，食完立刻想走。