嘉彩酒樓 (屯門)

 

 

 

拜完山，同親戚黎到三聖嘅嘉彩食海鮮，其實已經黎過好幾次，次次都係買海鮮黎加工，呢道加工無抽水，味道好，價錢合理。

今次買左約二千蚊海鮮，有蝦，蟹，蠔，班，聖子，鮑魚同鮮尤。 蝦揀左豉油王同開邊蒜容蒸，蒸個味略淡，後多加了豉油味道好多了，大愛佢個粉絲底，撈飯一流。

豉椒炒聖子，好惹味，連啲青椒都食哂。 砵酒蠔，個汁甜甜地，洋蔥底，鐡煲上，有啲啫啫feel，又係好味到連洋蔥都食哂。

姜蔥炒蟹，我無食。

燒鵝，呢間酒樓岀名，親戚話無啲肉唔得喎，於是加左呢樣，肉唔韌，多肉汁，少少肥，個皮燒得好香口，正！ 清蒸石班同鮑魚，時候剛好，無蒸老哂，好鮮甜。

椒鹽鮮尤，粉唔係太厚，無炸到硬實實，鍾意香口野就啱哂。 加左金銀蛋烚菜，未影相已經比人食哂……

送左蒸千層糕，紅荳沙同合時生果，生果有橙同西瓜。剛蒸起嘅千層糕好鬆軟，正！紅荳沙好綿不過超甜，鍾意甜食的我食左兩碗。

因為權限問題不能上載太多相，用了併圖方式，加上影相時親戚經已起筷，好多相都好檬。

計埋加工費、飯、酒水等成餐唔使三千，我地一行十五人，圍起都唔使兩百，抵食啦。